НҮБ-ын ХХААБ-ын Ерөнхий захирлын санаачилга болох “Гараас гарт” хөтөлбөрийн хүрээнд зохион байгуулагдаж буй Ази, Номхон Далайн бүсийн хөрөнгө оруулалтын форум 2025.06.18-20-ны өдрүүдэд Тайландын Бангкок хотноо боллоо.
Форумд бүсийн 15 улс оролцож буй бөгөөд Монгол Улсын төлөөлөл ХХААХҮЯ-ны Төрийн нарийн бичгийн дарга Т.Жамбалцэрэн адууны мах, хонины мах, ноолуур, ингэний сүү, өвлийн хүлэмжийн хүнсний ногоо зэрэг гол бүтээгдэхүүнд суурилсан хөрөнгө оруулалтын төлөвлөгөөг танилцуулсан. Тэрбээр Монгол орны газар зүйн онцлог, ядуурлыг буруулахад оруулж буй хувь нэмэр, уур амьсгалын өөрчлөлтийг бууруулж буй байдал болон эдийн засгийн оновчлолгыг харгалзан үзэж бэлчээрийн адууны мах, хонины мах, нэмүү өртөг шингэсэн ноолууран бүтээгдэхүүн, ингэний сүү, болон өвлийн хүлэмжийн хүнсний нарийн ногоог онцолсон юм.
Энэхүү санаачилга нь ядуурлыг бууруулах, уур амьсгалын өөрчлөлтөд дасан зохицох, тогтвортой хөдөө аж ахуйг дэмжих зорилготой. Гишүүн орнуудын хамтын ажиллагааг бэхжүүлэх чухал платформ юм.
Хурлын үеэр ХХААХҮЯ-ны Төрийн нарийн бичгийн дарга Т.Жамбалцэрэн НҮБ-ын Хүнс, хөдөө аж ахуйн байгууллагын (ХХААБ) Ази, Номхон далайн бүсийн захирал (ADG) Алуэ Дохонгтой уулзалт хийлээ. ХХААБ-ын бүсийн захирал Төрийн нарийн бичгийн даргад талархал илэрхийлж, хоёр талын хамтын ажиллагаа өргөжин гүнзгийрч байгаад сэтгэл хангалуун байгаагаа илэрхийлэв. Цаашид хүнсний аюулгүй байдал, нэг эрүүл мэнд, бичил биетний тэсвэржилт, био-аюулгүй байдал, байгаль орчин, бэлчээр, ойн менежментийн чиглэлээр хамтын ажиллагаагаа өргөжүүлэхэд таатай байгаагаа илтгэв.
Мөн Монгол Улс “Гараас гарт” санаачлагын хүрээнд хөрөнгө оруулалтын төлөвлөгөөгөө форумын үеэр амжилттай танилцуулж байгааг өндрөөр үнэлэв. Тэрээр ингэний хоормог зэрэг бүтээгдэхүүнийг шинэлэг, экспортын болон хүнсний ач холбогдол өндөртэй гэж онцлон тэмдэглэж, Ром хотод зохион байгуулагдах үзэсгэлэнд танилцуулагдахаар болсонд талархан илэрхийллээ.