“Монгол Улсад цэвэр технологи, инновацийн бизнесийг дэмжих замаар ногоон ажлын байр бий болгох” төслийн албан ёсны нээлтийн арга хэмжээ боллоо.
Нээлтийн арга хэмжээний үеэр Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, БОУАӨЯ-ны Төрийн нарийн бичгийн дарга Ш.Батбаяр, НҮБ-ын Суурин зохицуулагч Жаап ван Хиерден болон UNIDO-ийн үйлдвэрийн хөгжлийн мэргэжилтэн Гершвин Мкьюр нар үг хэлж, олон улсын хамтын ажиллагаа болон Монгол Улсын цэвэр технологийн хөгжилд тус хөтөлбөрийн ач холбогдлыг онцлон тэмдэглэлээ.
Төслийн зорилго нь Монгол Улсад цэвэр технологийн инновацийг хөгжүүлж, стартап болон жижиг, дунд бизнесийн өсөлтийг дэмжих, бодлогын уялдааг хангах, ногоон ажлын байр бий болгох явдал юм.
Арга хэмжээний үеэр хамтын ажиллагааны санамж бичигт гарын үсэг зурж, банк санхүүгийн байгууллагууд ЖДҮ-ийн санхүүжилтийн хүртээмжийг нэмэгдүүлж, ногоон бизнесийн өсөлтийг дэмжин хамтарч ажиллахаар боллоо.
GCIP Монгол хөтөлбөрийн хүрээнд 2600 гаруй ЖДҮ-д хүрч 90,000 гаруй тонн нүүрстөрөгчийн ялгарлыг бууруулах бодит хувь нэмэр оруулахыг зорьжээ.
