Гадаад харилцааны яам, Хүнс, хөдөө аж ахуй, хөнгөн үйлдвэрийн яам, НҮБ-ын Хүнс, хөдөө аж ахуйн байгууллагаас зохион байгуулсан Хүнс, хөдөө аж ахуйн салбарын эмэгтэйчүүдийн олон улсын жилийн нээлт Улаанбаатар хотноо өнөөдөр боллоо.
Тус үйл ажиллагаа нь Монгол Улсын хүнс, хөдөө аж ахуйн салбарт үнэтэй хувь нэмэр оруулж, хөдөөгийн амьжиргааг дэмжих, уламжлалт хөдөө аж ахуйн мэдлэг туршлагыг өвлүүлэх үйлсэд тодорхой үүрэг гүйцэтгэж буй эмэгтэйчүүдийн хөдөлмөр, манлайллыг тодотгох зорилгыг агуулж байв.
Тиймд Гадаад харилцааны сайд Б.Батцэцэг нээлтийн үгэндээ, Хүнс, хөдөө аж ахуйн салбарын эмэгтэйчүүдийн олон улсын жилд хэд хэдэн чиглэлд бодитой ахиц гаргахыг зорьж буй. Тухайлбал, юуны түрүүнд эмэгтэйчүүдийн мэргэжлийн ур чадвар, мэдлэг боловсролыг нэмэгдүүлэх. Хоёрдугаарт, зээл, даатгал, хадгаламж зэрэг санхүү, эдийн засгийн боломжийг сайжруулах. Гуравдугаарт, инновац, технологийн шийдлийг нэвтрүүлж, эмэгтэйчүүдийн ажлын ачааллыг багасаж, бүтээмжийг өсгөх. Дөрөвдүгээрт, төр, хувийн хэвшил, олон улсын байгууллага, иргэний нийгэм, орон нутгийн байгууллагын хамтын ажиллагааг нэг зорилгод уялдуулж, бодит үр дүн гарахуйц төсөл хөтөлбөр хэрэгжүүлэх. Тавдугаарт, тэдний нийгмийн баталгааг хангах, үр хүүхдээ өсгөх, нийгмийн амьдралд идэвхтэй оролцох боломжийг илүүтэй бүрдүүлэх шаардлагатайг онцлов. Түүний зэрэгцээ Үндэсний их баяр наадмын үеэр тэмдэглэх Дэлхийн адууны өдрөөр эмэгтэйчүүдийн үйлдвэрлэл, хоршоо, жижиг дунд бизнесийг дэмжих, аялал жуулчлал, соёлын бүтээлч үйлдвэрлэлийг нэмэгдүүлэх, олон улсын түншлэлээ тэлэх зэрэг гарц нээгдсэнийг тэмдэглэлээ.
НҮБ-ын Хүнс, хөдөө аж ахуйн байгууллагын Монгол дахь суурин төлөөлөгч Чинюнь Дяо мөн үеэр хэлэхдээ монгол орны хүнс, хөдөө аж ахуйн салбарын гол хөдөлгөгч хүч болсон малчин эмэгтэйчүүдийн нуруун дээр хүнс үйлдвэрлэл, мал сүргийг хариулах, байгалийн нөөцийг хамгаалах, уламжлалт мэдлэгийг хадгалах, гэр орны ахуй амьдралыг өргөж явах зэрэг маш олон үүрэг явдаг. Өөрөөр хэлбэл, эмэгтэй фермерүүдийг дэмжих нь зөвхөн тэгш эрхийн тухай асуудал биш хүнсний аюулгүй байдал, уур амьсгалын өөрчлөлтийн эсрэг тэсвэрлэх чадвар, бэлчээрийн тогтвортой менежмент, хүртээмжтэй эдийн засгийн өсөлтийн эх үндэс нь эмэгтэйчүүд хэмээн тодотголоо.
Ховд аймгийн Дарви сумын Дэлгэр багийн малчин Ш.Цэрэндэжид 1994 оноос хойш буюу 30-аад жил мал маллажээ. Түүний хувьд тооны олонд бус чанарт анхаарч, сүргийн тоог 500-гаас нэг их цөөрүүлэхгүй, бас нэмэхгүй байх нь зохистой. Ингэснээр ажлын ачааллын зохистой харьцаа хангаж, тухайн малчны эрүүл мэнд, ахуй амьдралдаа зарцуулах цаг гарна гэж тэрбээр үзэж байна. Тэднийх хонь ямаа голдуу 500-гаад толгой малтай. Зун, намрын улиралд сааль сүүгээ боловсруулж, өрхийн хэрэгцээгээ хангахын зэрэгцээ ойр тойрны иргэдэд худалдан борлуулдаг. Ямааны сүүг 5000, ааруулаа 20 мянган төгрөгөөр борлуулдаг. Хавартаа ноолуураа зарж, өрхийн санхүүгийн гол орлогоо болгодог байна. Тэрбээр тариаланч, малчин эмэгтэйчүүдийн нийгэм, эдийн засгийн хөгжилд оруулж буй хувь нэмрийг үнэлж, бодлогоор дэмжих тухайд яригдаж байгаад баяртай байгаагаа энэ үеэр илэрхийлэв.
2021 оны байдлаар дэлхийн хүнс, хөдөө аж ахуйн салбарын ажиллах хүчний 41 хувийг эмэгтэйчүүд бүрдүүлж, эрэгтэй ажиллагсдын харьцаатай бараг тэнцэж ирсэн байна. Манай улсын хувьд тус салбарт 689 мянган хүн ажиллаж байгаагийн 48 хувь нь эмэгтэйчүүд байгааг Хүнс, хөдөө аж ахуй, хөнгөн үйлдвэрийн яамны Бодлого төлөвлөлтийн газрын дарга Ц.Болорчулуун илтгэлдээ дурдав.
Эх сурвалж: Монцамэ агентлаг