Даланзадгад, 2026 оны гуравдугаар сарын 17 /МОНЦАМЭ/. Нөөцийн махыг зургаан цэгээр дамжуулан худалдаж эхэллээ.
Даланзадгад сумын хүн амын 2026 оны хавар, зуны улирлын махны хэрэгцээг хангах, махны хомсдол үүсэхээс сэргийлэх, үнийн хөөрөгдлийг таслан зогсоох, үнийг тогтворжуулах зорилгоор 100 тонн махны нөөц бүрдүүлэн бэлтгэжээ.
Нийт махны 20 хувь нь үхрийн мах, 30 хувь нь хонины мах, 50 хувь нь ямааны мах бөгөөд нэг килограмм үхрийн ястай мах 14000, хониных 9500, ямааны ястай махыг 9000 төгрөгөөр энэ сарын 16-аас эхлэн борлуулж байна.
Нөөцийн мах худалдан борлуулах цэгүүд Зүүнсайхан хорооллын “Ихэр баян” дэлгүүр, Гурван сайхан хорооллын “Sunrise” дэлгүүр, Нисэх хорооллын “Түшиг” дэлгүүр, Их уул хорооллын “Аривжих” дэлгүүр, Хан-Уул хорооллын “Эрдэнэ мах маркет”, Оюут хорооллын “Баян бүрд” дэлгүүрээр худалдаж байна.
2025 онд 130 тонн мах нөөцөлж, үхрийн мах килограммыг 10 500, хонины мах 8 500, ямааны махыг 7 500 төгрөгөөр худалдсан юм.
Эх сурвалж: Монцамэ агентлаг
