“Хүнсний хангамж, аюулгүй байдал” үндэсний хөдөлгөөний хэрэгжилт, үр дүнтэй танилцах “Зөвлөлдөх уулзалт” Ховд аймагт боллоо.
Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр “Хүнсний хангамж, аюулгүй байдал” үндэсний хөдөлгөөний хүрээнд улс даяар хийгдэж буй үйл ажиллагаа, дэвшүүлж буй зорилтууд, үр дүнгийн талаар танилцуулж, орон нутгийн хүнсний үйлдвэрлэл эрхлэгчидтэй санал солилцлоо.
Уулзалтын үеэр “Хүнсний хувьсгал” мэргэжлийн холбооны Ховд аймаг дахь салбар зөвлөлийн тэргүүнээр аймгийн “Хан Алтайн Инээмсэглэл” ББН-ийн захирал Т.Отгонхишиг сонгогдлоо.
Ховд аймагт “Хүнсний хангамж, аюулгүй байдал” үндэсний хөдөлгөөний хүрээнд олгогддог бага хүүтэй, урт хугацаатай хөнгөлөлттэй зээлд 300 гаруй иргэн, аж ахуй нэгж хамрагдаж, дотоодын хүнсний хангамжаа өсгөжээ.
Хөдөлгөөний үр дүнд аймагт шинээр таван мал төхөөрөх үйлдвэр баригдан үйл ажиллагаа эхлүүлж 392.9тн махыг экспортод гаргаад байна.
Мөн баялаг бүтээгч иргэн, аж ахуйн нэгжүүдэд хүүгийн хөнгөлөлт үзүүлэн орон нутгийн төсвөөс 2025 онд 2.0 тэрбум, 2026 онд 2.0 тэрбум төгрөгийн санхүүжилтийг шийдвэрлэж арилжааны банкуудаар дамжуулан хэрэгжүүлж байна.
Ховдчууд мал аж ахуйгаа хөгжүүлэх, малын үүлдэр, угсааг сайжруулах, ашиг шимийг дээшлүүлэхэд анхаарч, ингэний сүүний үйлдвэр барих томоохон төсөл хэрэгжүүлж байна.
