Монгол Улсын Ерөнхийлөгч Ухнаагийн Хүрэлсүхийн Бүгд Найрамдах Казахстан Улсад хийж буй төрийн айлчлал үргэлжилж байна.
Энэ хүрээнд “Хүнсний хувьсгал” болон “Цагаан алт” үндэсний хөтөлбөрүүдийн хүрээнд хүнс, хөдөө аж ахуй, мал аж ахуйн салбарын аж ахуйн нэгжүүдийн үйлдвэрлэл, экспортын чадавхыг нэмэгдүүлэх, салбарын өрсөлдөх чадварыг сайжруулах, гадаад зах зээлд нэвтрэх боломжийг өргөжүүлэх “Монгол–Казахстаны бизнес форум”-ыг зохион байгуулж байна.
Бизнес форумд Бүгд Найрамдах Казахстан Улсын Шадар сайд бөгөөд Үндэсний эдийн засгийн сайд С.Жумангарин, Бүгд Найрамдах Казахстан Улсын Худалдаа, интеграцийн яамны Төрийн нарийн бичгийн дарга А.Бижанова, Монгол Улсын Тэргүүн Шадар сайд бөгөөд Эдийн засаг, хөгжлийн сайд Ж.Энхбаяр, Монголын Үндэсний Худалдаа Аж Үйлдвэрийн Танхимын Ерөнхийлөгч Б.Лхагважав нар нээж үг хэллээ.
Мөн Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, хоёр улсаас хүнс, хөдөө аж ахуй, хөнгөн үйлдвэр, худалдаа үйлчилгээ, уул уурхай, барилга, мэдээллийн технологи, эрчим хүч, боловсрол, банк санхүү зэрэг салбарын 150 гаруй төлөөлөл оролцлоо.
Бизнес форумын үеэр компаниуд нийт 17 хамтын ажиллагааны санамж бичиг, гэрээнд гарын үсэг зурлаа.
Казахстаны гадаад худалдааны нийт эргэлт өнгөрсөн онд 144 тэрбум ам.доллар, үүнээс экспорт 80 тэрбум, импорт 65 тэрбум ам.доллар болсон.
Хар болон өнгөт метал, хүдрийн түүхий эд, түлш, газрын тос, газрын тосны бүтээгдэхүүн экспортолж, машин, тоног төхөөрөмж, тээврийн хэрэгсэл, өргөн хэрэглээний бараа бүтээгдэхүүн импортоор авдаг юм байна.
Манай хоёр улсын худалдааны эргэлт өнгөрсөн онд 58 сая ам.доллар давсан нь 2024 онтой харьцуулахад 7.2 хувиар өссөн гэсэн үг юм.
Манай улс Казахстанд хүнсний бүтээгдэхүүн, адууны мах, ноос, ноолууран бүтээгдэхүүн, хивс, хивсэнцэр, транзит автомашин нийлүүлж, гурилан бүтээгдэхүүн, чихэр, жимс, цагаан будаа, тамхи, коньяк зэргийг авдаг.
