Хүнсний гол нэрийн бүтээгдэхүүний нийлүүлэлт ерөнхийдөө тогтвортой байгаа хэдий ч дэлхий дахинд хүнс, шим тэжээлийн аюулгүй байдал улам дордож байна. Өнгөрсөн гуравдугаар сарын шинэчлэлээс хойш хөдөө аж ахуйн бүтээгдэхүүний үнийн индекс 3 хувь, үр тарианы үнийн индекс 4 хувиар тус тус өсжээ. Зэвсэгт мөргөлдөөн болон уур амьсгалын өөрчлөлтөөс үүдэлтэй гамшиг нь хурц хүнсний хомсдолын гол шалтгаан хэвээр байна.
Зүүн болон Өмнөд Африкийн бүс нутагт хүнсний тусламж нэн шаардлагатай байгаа хүний тоо 67 саяд хүрээд байна. Мөн Суданд 14 бүс нутаг өлсгөлөнгийн өндөр эрсдэлтэй гэж үнэлэгдсэн бол Баруун болон Төв Африкт 2026 оны зургаагаас наймдугаар сарын ургац хураалтын өмнөх “өлсгөлөнгийн улирал”-ын үед 52.9 сая хүн хүнсний хурц дутагдалд орох төлөвтэй байна.

Ойрхи Дорнодын мөргөлдөөн хүнсний аюулгүй байдалд шинэ эрсдэл үүсгэж байна.

Ойрхи Дорнод дахь мөргөлдөөн дэлхийн хүнсний аюулгүй байдалд үзүүлэх эрсдэлийг нэмэгдүүлж байна. Ялангуяа Ормузын хоолойгоор газрын тос, байгалийн хий, бордооны нийлүүлэлт саатсанаар карбамид (urea) бордооны үнэ нэг сарын дотор 46 хувиар өссөн бөгөөд хөдөө аж ахуйн бүтээгдэхүүний үнийн индексийг 8 хувиар нэмэгдүүлжээ. Энэ нь хүнсний бүтээгдэхүүний хүртээмж, худалдан авах чадварт сөргөөр нөлөөлөх эрсдэлийг улам өсгөж байна.

Дэлхийн банкны Commodity Markets Outlook тайланд дурдсанаар 2026 онд бордооны үнэ дунджаар 31 хувиар өсөж, 2022 оноос хойших хамгийн өндөр, хамгийн хүртээмжгүй түвшинд хүрэх төлөвтэй байна.

Эль-Ниньо дахин хүчтэй нөлөөлж болзошгүй
2026 оны дунд үеэс эхлэн Эль-Ниньо үзэгдэл бий болох магадлал 61–87 хувь байгаа бөгөөд энэ нь 2027 он хүртэл үргэлжлэх төлөвтэй байна. Хэрэв ийм нөхцөл үүсвэл Өмнөд Ази, Өмнөд Африк болон Зүүн Азийн зарим бүс нутгийн газар тариалангийн үйлдвэрлэлд ноцтой нөлөөлж, цагаан будааны ургац 20–50 хувиар буурах эрсдэлтэй гэж шинжээчид үзэж байна.

Эх сурвалж: WORLD BANK GROUP