Монгол Улсын Ерөнхийлөгчийн Тамгын газрын даргын 2025 оны 02 дугаар сарын 13-ны өдрийн 29 дүгээр захирамжаар байгуулагдсан ажлын хэсгийн 4 дүгээр хурал боллоо.
Ажлын хэсгийн ахлагчаар Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, гишүүдээр яам, агентлагийн хяналт шинжилгээ, үнэлгээний газрын дарга нар, бусад албан тушаалтнууд ажиллаж байна.
Тус ажлын хэсэг нь Улсын Их Хурлын 2022 оны “Хүнсний хангамж, аюулгүй байдлыг хангах талаар авах зарим арга хэмжээний тухай ” 36 дугаар тогтоолын хэрэгжилтэд хийсэн хяналт шинжилгээний мэдээлэлд үндэслэн зорилтот түвшинд хүрч байгаа эсэх, хүрээгүй бол шалтгаан нөхцөлийг тодорхойлж, үр дүнг сайжруулах дүгнэлт, зөвлөмж боловсруулж, холбогдох байгууллагуудад хүргүүлж, хэрэгжилтийг хангахад анхаарч ажиллах юм.
Өнөөдрийн хурлаар “Хүнсний хангамж, аюулгүй байдал” үндэсний хөдөлгөөний хүрээнд гарсан үр дүн, үр нөлөө, цаашид шаардлагатай дэд бүтэц, тээвэрлэх тогтолцоо, мөн эдийн засгийн ач холбогдолтой танилцаж, санал солилцлоо.
Хурлаар дараах асуудлыг хэлэлцлээ:
- “Хүнсний хангамж, аюулгүй байдлыг хангах талаар авах зарим арга хэмжээний тухай” УИХ-ын 36 дугаар тогтоолын төсөв, санхүүжилт, гүйцэтгэл
- Нийслэлийн хэмжээнд “Хүнсний хангамж, аюулгүй байдал” хөдөлгөөний хүрээнд гарсан үр дүн, үр нөлөө
- Хүнсний гол нэрийн 19 бүтээгдэхүүний статистик шинжилгээ ба үр дүн
- Хүнсний хангамж, аюулгүй байдлыг хангахад шаардлагатай дэд бүтэц, тээвэрлэх тогтолцоо, үр дүн
- “Хүнсний хангамж, аюулгүй байдал” хөдөлгөөн хэрэгжүүлснээр нийгэмд үзүүлэх нөлөөлөл, эдийн засгийн ач холбогдол
Хүнс, ХАА-н салбар нь 2024 оны байдлаар дотоодын нийт бүтээгдэхүүний 9.7 хувийг эзэлж байгаа бөгөөд үүний 7.3 хувийг ХАА-н салбар 2.4 хувийг хүнсний салбар эзэлж байна. Мөн ХАА-н салбарт үйл ажиллагаа явуулж байгаа ААНБ-ын тоо өмнөх оноос 49.1 хувь, хүнсний үйлдвэрлэлийн салбарын ААНБ-ын тоо 21.7 хувиар өссөн байна.
Зам, тээврийн яам нь УИХ-ын 36 дугаар тогтоолын хүрээнд 6 арга хэмжээг гүйцэтгэх төлөвлөгөөтэй бөгөөд хэрэгжилтийн явцыг танилцууллаа. Тухайлбал Хүнсний тээвэр, логистик, ачаа эргэлтийн бүртгэлтэй холбоотой зам, тээврийн салбарын мэдээллийн нэгдсэн сангийн платформыг хөгжүүлэх ажлыг хийж байна.
Цаашид:
- Хууль эрхзүйн нэгдсэн систем: Тээвэр логистикийн салбарын цогц зохицуулалт бүхий Тээврийн ерөнхий хуулийн төслийг боловсруулж байна.
- Төрийн бодлого: Тээвэр, логистикийн салбарыг дэмжихэд чиглэсэн бодлого, төлөвлөлтийг хийх. Үүнд: дэд бүтэц, логистикийн үйлчилгээний чанар, хүртээмж, мэдээллийн солилцоо, нэгдсэн систем, үйлдвэрлэл, худалдааны салбартай уялдсан төлөвлөлт, хөгжүүлэлт.
- Үйл ажиллагааны хамтрал: Логистикийн компаниуд хоорондоо нэгдэхийг дэмжих, гадаадын логистикийн компаниудтай өрсөлдөж чадахуйц эрхзүйн чадамж (олон улсын гэрээ хэлэлцээр хийх гэх мэт) бүхий томоохон нэгдэл байгуулах, эсвэл төрийн өмчийн логистикийн компанийг байгуулах.
- Мультфункцианал логистикийн төвүүдийг байгуулах: Тээврийн олон төрлийг хамрах боломжтой, үйлдвэрлэл, худалдааны төвлөрөлд түшиглэсэн, гаалийн бүрдүүлэлт, бусад зөвшөөрөл, үйлчилгээг нэг дороос авах боломж бүхий.
- Мэдээллийн нэгдсэн сүлжээ: Тээвэр логистикийн үйл ажиллагаанд оролцогч бүх талуудын үйл ажиллагааг хамарсан мэдээллийн нэгдсэн системийг үүсгэх зэрэг ажлуудыг хэрэгжүүлэх шаардлагатай байна.
Ажлын хэсгийн дараагийн хурлаар хэрэгжилтэд хийсэн хяналт шинжилгээний мэдээлэлд үндэслэн үр дүнг сайжруулах дүгнэлт, зөвлөмж боловсруулж холбогдох байгууллагад хүргэх юм.
