Засгийн газраас “Атар-IV” аяны хүрээнд бэлчээрийн мал аж ахуйн үйлдвэрлэл, хөгжлийг дэмжих зорилгоор “Нутагтаа эзэн 100:1000” төслийг хэрэгжүүлж байна.
Төслийн хүрээнд Даланжаргалан сумын Элдэв багийн нутагт 110 га талбайд ногоон тэжээл тариалж байна. Тус талбайд судан өвс, овъёос, арвай гэсэн гурван төрлийн таримал тариалжээ.
Ургацын байдлаас үзэхэд судан өвс нь говийн бүсийн хөрс, цаг уурын нөхцөлд ургахад тохиромжтой нь харагдаж байна. Тиймээс ирэх оноос дараагийн суманд ногоон тэжээл тариалах ажлыг үе шаттай зохион байгуулахаар төлөвлөж байгааг аймгийн ХХААГ-аас мэдээллээ.
Судан өвс нь хээрийн бүсийн гандуу, хуурай уур амьсгалтай нутагт ургаж, арвин ургац өгдөг таримал бөгөөд өвсний ургацаараа бусад төрлийн таримлаас давуу үзүүлэлттэй байдаг байна. Хөрс боловсруулах, бордох, тарих, арчлах ажлыг агротехнологийн дагуу чанартай хийсэн тохиолдолд нэг га талбайгаас 18-30 центнер өвсний ургац авах боломжтой аж.
Говийн бүсэд байгалийн хадлан бэлтгэх боломж хязгаарлагдмал байдаг. Харин ногоон тэжээл тариалснаар малчид өндөр үнээр өвс, тэжээл худалдан авах хэрэгцээ нь буурч, малын тэжээлийн хангамж сайжрахын зэрэгцээ өрхийн орлогод эерэгээр нөлөөлнө гэж үзэж байна. Үүнээс гадна Иххэт сумын Бүрдэнэ багийн “Өнгөт малчдын бүлэг” ногоон тэжээл тариалж туршжээ.
Эх сурвалж: Монцамэ агентлаг
