Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр Орхон аймгийн Баян-Өндөр суманд “Хүнсний хангамж, аюулгүй байдал” үндэсний хөдөлгөөний хүрээнд аймагтаа талх, нарийн боов үйлдвэрлэдэг “Тэмүүжин Оргил” ХХК-ийн хүнсний үйлдвэрийн үйл ажиллагаатай танилцлаа.
Тус үйлдвэр нь “Хүнсний хувьсгал” үндэсний хөдөлгөөний хүрээнд олгодог бага хүүтэй, урт хугацаатай хөнгөлөлттэй зээлд хамрагдан үйлдвэрийн тоног төхөөрөмжийг шинэчилж, 30 гаруй хүнийг ажлын байраар хангажээ. “Тэмүүжин Оргил” ХХК нь 26 төрлийн эрүүл ахуйн шаардлага хангасан нутгийн брэнд бүтээгдэхүүн үйлдвэрлэж Орхон аймгийн 300-аад цэгээр борлуулдаг байна.
“Тэмүүжин Оргил” ХХК-ийн хүнсний үйлдвэрийн захирал Б.Тэмүүжин
“Манай үйлдвэр хөнгөлөлттэй зээлд хамрагдсанаар үйлдвэрийн хүчин чадлаа хоёр дахин нэмж 1.5 тн бүтээгдэхүүн үйлдвэрлэдэг болсон. “Хүнсний хувьсгал” хөдөлгөөний хүрээнд авсан хөнгөлөлттэй зээл жижиг, дунд үйлдвэрлэлийг бодитоор дэмжиж, зах зээлд өрсөлдөх том боломж олгож байна” гэв.
Мөн орон нутгийн хүнсний салбарын баялаг бүтээгчид Бүсчилсэн хөгжлийн бодлогын хүрээнд “Хүнсний хувьсгал” үндэсний хөдөлгөөний 2 дугаар шатыг эхлүүлэн эрчимжүүлж, жижиг дунд үйлдвэрлэлийг дэмжих хэрэгтэйг хэлж байлаа.
