Хойд бүсийн хоршоологчдийн зөвлөгөөн боллоо. Зөвлөгөөнд УИХ-ын гишүүн, ТББХ-ны дарга Ж.Бат-Эрдэнэ, УИХ-ын гишүүн Х.Баасанжаргал, Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, ажлын алба болон Хөвсгөл, Булган, Орхон аймгийн 200 орчим малчин, хоршоологчид оролцлоо.
Зөвлөгөөнөөр шинэ хоршоо хөдөлгөөний хэрэгжилтийн явц, цаашид хэрэгжүүлэх арга хэмжээний чиглэл, зээлийн эргэн төлөлтийн асуудал, Малын индексжүүлсэн даатгалын тухай хуулийн нэмэлт, өөрчлөлтийн төсөл зэрэг сэдвүүдийг хэлэлцэв.
Мөн хоршоодод эзэмшүүлэх 5 га газрын зохицуулалт, тэжээлийн ургамал тариалах журмын талаар танилцуулж, татварын хөнгөлөлт, чөлөөлөлт, бүртгэл, тайлагналтай холбоотой мэдээллийг өглөө.
Хойд бүсийн аймгуудын тухайд:
- Булган аймагт 632 шинэ хоршоо байгуулагдаж, 6313 малчин
- Орхон аймагт 71 шинэ хоршоо байгуулж, 680 малчин
- Хөвсгөл аймагт 691 шинэ хоршоо байгуулагдаж, 6796 малчин гишүүнээр тус тус элсжээ.
Зөвлөгөөний үеэр бүсийн хоршоод өөрсдийн ололт амжилтаа хуваалцаж, тулгамдаж буй асуудлуудаа нээлттэй хэлэлцэн, харилцан туршлага солилцлоо.
“Шинэ хоршоо хөдөлгөөн” тогтвортой үргэлжилсэнээр мал аж ахуйн салбарыг уур амьсгалын өөрчлөлтийн сөрөг нөлөөллөөс хамгаалах, гэнэтийн гамшиг ослын үеийн эрсдэлийг бууруулах, малчин өрхийн амьжиргааг дэмжих, орлогыг нэмэгдүүлэх, мал, малын гаралтай түүхий эд, бүтээгдэхүүний мөнгөн урсгалыг тогтмолжуулах, хүнсний аюулгүй байдал, тогтвортой нийлүүлэлтийг бий болгох, хоршоологч, үйлдвэрлэгчийн түншлэлийг дэмжиж, жижиг, дунд үйлдвэрлэлийг тогтвортой хөгжүүлэх, хөдөөгийн сэргэлтийг бодит ажил болгох зэрэг ач холбогдолтой юм.
Цаашид салбар дундын уялдаа холбоог ханган малын түүхий эд, мах махан бүтээгдэхүүн, сүү сүүн бүтээгдэхүүний гарц, чанарыг сайжруулах чиглэлд “Хүнсний хувьсгал” үндэсний хөдөлгөөнтэй хамтарч ажиллах юм.
