Сүүлийн жилүүдэд эрдэмтэд сайн унтах нь зөв хооллолт, дасгал хөдөлгөөнтэй адил хүний эрүүл мэндэд чухал нөлөөтэйг онцолж байна. Насанд хүрсэн хүн өдөрт дунджаар 7–9 цаг чанартай унтах нь тархи, зүрх, дархлаа болон сэтгэл зүйд олон талын ашиг тустай ажээ.

Сайн унтахын ач тус
-Тархины үйл ажиллагааг сайжруулна
Хангалттай унтсан үед ой тогтоолт, төвлөрөл, шийдвэр гаргах чадвар илүү сайн байдаг. Судлаачдын үзэж буйгаар унтах үеэр тархи өдөржин хуримтлагдсан мэдээллийг “ангилан боловсруулдаг” байна.

-Дархлааг дэмжинэ
Чанартай нойр нь биеийн дархлааны эсүүдийг идэвхжүүлж, халдвар болон өвчинтэй тэмцэх чадварыг нэмэгдүүлдэг. Харин нойр дутуу байх нь ханиад хүрэх эрсдэлийг өсгөдөг гэжээ.
-Сэтгэл санааг тогтворжуулна
Нойр муутай үед стресс, уур бухимдал, түгшүүр нэмэгдэх хандлагатай байдаг. Харин тогтмол сайн унтдаг хүмүүсийн сэтгэл санаа илүү тогтвортой байдаг байна.

-Зүрх судасны эрүүл мэндэд тустай
Шөнө хангалттай амрах нь цусны даралтыг тогтворжуулж, зүрхэнд ирэх ачааллыг бууруулдаг. Мөн удаан хугацааны нойр дутуу байдал нь зүрх судасны өвчний эрсдэлийг нэмэгдүүлдэг гэж мэргэжилтнүүд анхааруулж байна.

Эрүүл унтахад туслах хэрэгтэй дадлууд

–Тогтмол цагт унтаж, сэрэх
Амралтын өдөр ч гэсэн ижил цагийн хуваарь баримтлах нь биеийн дотоод цагийг тогтворжуулдаг.

-Унтахын өмнө дэлгэц бага ашиглах
Гар утас, компьютерийн цэнхэр гэрэл нь нойр хүргэдэг мелатонин дааврын ялгаралтыг бууруулдаг тул унтахаас 1 цагийн өмнө дэлгэцээс хол байхыг зөвлөж байна.

-Орой хэт их кофеин хэрэглэхгүй байх
Кофе, хүчтэй цай, энергийн ундаа зэрэг нь тархийг сэргээж, унтахад саад болдог.

-Тайван орчин бүрдүүлэх
Чимээ багатай, харанхуй, сэрүүхэн өрөө нойрны чанарыг сайжруулдаг. Зарим хүмүүс намуухан хөгжим эсвэл ном уншихыг тайвшруулах арга болгон ашигладаг байна.

Өдөр бүр чанартай унтаж хэвших нь эрүүл мэндээ хамгаалах хамгийн энгийн бөгөөд үр дүнтэй дадлуудын нэг гэж мэргэжилтнүүд зөвлөж байна.