Монгол, Хятадын сэтгүүлчдийн хамтарсан сурвалжлагын баг БНХАУ-ын Эрээн хот дахь “Хаоган” жимс, хүнсний ногоо, амуу будаа, хүнсний тосны импорт, экспортын паркийн үйл ажиллагаатай танилцлаа.
2007 оны 3 дугаар сард 10 сая юанийн хөрөнгө оруулалтаар байгуулагдсан тус парк Эрээн хотод жимс, хүнсний ногооны төрлийн хөдөө аж ахуйн бүтээгдэхүүнийг Монгол Улсад экспортлох эрх бүхий гаалийн хяналтын цорын ганц байгууллага юм.
Тус компани жимс, хүнсний ногооны экспортын худалдаа, бэлэн хоол болон хүнсний бүтээгдэхүүний урьдчилан боловсруулалт, хөлдөөсөн болон хатаасан жимс, хүнсний ногооны үйлдвэрлэл, төмсний шарсан бүтээгдэхүүний хагас боловсруулалт, амуу будаа, хүнсний тосны импорт, экспорт, логистик, агуулах, тээвэрлэх үйл ажиллагаа явуулдаг.
Паркийн нийт талбай 80 мянган ам метр бөгөөд 13 ширхэг, 25 мянган ам метр талбайтай тогтмол температур бүхий агуулахтай. Мөн 10 мянган ам метр талбайд хяналт шалгалтын бүс, 3700 ам метр талбайд хамтарсан шалгалтын нэгдсэн байртай үйл ажиллагаа явуулж байна.
Тус компанийн агуулахаас өдөр бүр 25 тонн хүртэлх даацтай 30 орчим автомашин жимс, хүнсний ногоо тээвэрлэн, 24 цагийн дотор Улаанбаатар хотод хүргэдэг. Импортын бүтээгдэхүүнийг Монгол Улсын стандартын шаардлагад нийцүүлэн боловсруулж, савладаг. Парк дотор болон гадна орчин 24 цагийн цахим хяналтын камертай, мэргэжлийн лаборатори, хүнсний аюулгүй байдлын орчин үеийн тоног төхөөрөмжөөр бүрэн тоногложээ.
Мөн тус парк Монгол Улсаас мах, махан бүтээгдэхүүнийг БНХАУ-д нийлүүлэх чиглэлээр ажиллаж байгаа бөгөөд 2025 онд 20 мянган тонн мах худалдан авсан байна. Үүнээс гадна ОХУ-ын Байгаль нуурын бүсээс ус, рашаан импортлон Хятадын зах зээлд нийлүүлдэг аж.
Жолооч Т.Гүнжаргал, “Монголд жимс, хүнсний ногоо импортолдог 60 гаруй компани бий. Тэдгээр компанийн бүтээгдэхүүнийг энэ агуулахаас ачиж Эрээнээс Улаанбаатар хүртэл ойролцоогоор 10 цаг явдаг. Хятадын талд гаалийн шалгалтаа хийж, Монголын хил дээр дахин шалгуулаад шууд Улаанбаатарт хүргэдэг. Эндхийн агуулах цэвэр, стандартын шаардлага хангасан учраас жимс, ногооны чанар сайн. Нэг машинд бүдүүн ногоо 20-25 тонн, нарийн ногоо 19-22 тонн ачиж тээвэрлэдэг” гэв.
Монгол Улс жилд нийт 170 мянган тонн орчим жимс, хүнсний ногоог БНХАУ-аас Эрээн боомтоор дамжуулан импортолдог байна.
Эх сурвалж: Монцамэ агентлаг
