Дундговь аймгийн Стандарт, хэмжилзүйн газрын судалгаагаар аймгийн ундны усны хатуулаг 3.2 мг-экв/л хүрч, өндөр үзүүлэлттэй байгааг тогтоожээ.
Хатуулаг ихтэй ус удаан хугацаанд ууснаар бөөрний чулуужилт, шээс дамжуулах замын эрхтний өвчлөл, арьс, үс, шүдний эрүүл мэндэд сөргөөр нөлөөлдгийг эрүүл мэндийн мэргэжилтнүүд анхааруулж байна.
Сайнцагаан сумын ундны усны чанарт энэ онд хийсэн шинжилгээгээр 40 сорьц химийн болон нян судлалын үзүүлэлтээр MNS 0900:2018 стандартын шаардлага хангажээ.
Шинжилгээг Эрүүл мэндийн газрын улсын байцаагч, “Дундговь-Ус” ОНӨААТҮГ-ын химич хамтран хоёр усны эх үүсвэр, өргөх болон хлоржуулах станц, сумын төвийн 15 худаг, 5022 дугаар эх үүсвэрээс дээж авч, итгэмжлэгдсэн лабораторид гүйцэтгэсэн байна.
Говийн бүсийн хувьд ундны усны чанар стандартын шаардлагаас гадна усны нөөцийн хомсдол, газрын доройтол, цөлжилт, гангийн эрсдэл харилцан уялдаатай тул усны нөөцийг зөв зохистой ашиглах, хур тунадасны усыг хуримтлуулах шаардлагатай юм.
Дундговь аймгийн нутаг дэвсгэрийн 85.7 хувь нь хүчтэй болон нэн хүчтэй цөлжилтийн зэрэглэлд хамаарч байгаа тул ус, бэлчээр, экологийн нөхөн сэргээлтийг уялдуулсан арга хэмжээг хэрэгжүүлэхээр аймгаас санаачилгууд гаргасаар байна.
Эдгээр санаачилгыг Дундговь аймаг НҮБ-ын Цөлжилттэй тэмцэх тухай конвенцын Талуудын арван долдугаар бага хурал (COP17)-ын хүрээнд танилцуулж байна. Үүнд хөв цөөрөм байгуулах, усны эх үүсвэрийг хамгаалах, бэлчээрийг нөхөн сэргээх, салхины хамгаалалтын ногоон зурвас бий болгох зэрэг арга хэмжээг тусгажээ.
Усны чанарын хяналтыг сайжруулах зорилгоор энэ сарын 11-нд Дундговь аймгийн Байгаль орчны газарт усны чанарыг газар дээр нь хэмжих зориулалттай хээрийн багаж хүлээлгэн өгчээ. Ингэснээр усны чанарын зарим үзүүлэлтийг шуурхай тодорхойлж, хяналт-шинжилгээг тогтмолжуулах боломж бүрджээ.
Ундны усны чанарын хяналтыг усны эх үүсвэрийн хамгаалал, усны нөөцийн зохистой хэрэглээ, бэлчээрийн нөхөн сэргээлт, цөлжилтийг сааруулах арга хэмжээнүүдтэй уялдуулах нь Дундговь аймгийн усны аюулгүй байдлыг хангах чухал чиглэл болжээ.
Эх сурвалж: Монцамэ агентлаг
