Төв аймгийн Борнуур суманд малын тэжээлийн үйлдвэрлэл хөгжиж, орон нутгийн малчид, фермерүүдийн хэрэгцээг дотоодын үйлдвэрлэлээр хангах боломж бүрдэж байна.

Тус суманд үйл ажиллагаа явуулж буй “Борнуур тэжээл” үйлдвэр 2024 онд ашиглалтад орсон бөгөөд цагт 1–1.5 тонн малын тэжээл үйлдвэрлэх хүчин чадалтай. Үйлдвэрийн гол түүхий эд болох солом, тэжээлийн буудай, арвай, овъёос, байгалийн ургамал, хадлан зэргийг орон нутаг болон зэргэлдээ сумдын тариаланчдаас худалдан авч, хүчит тэжээл үйлдвэрлэдэг байна.

Үйлдвэрлэсэн тэжээлээ нутгийн малчид, үхрийн ферм эрхлэгчид болон Онцгой байдлын байгууллагад нийлүүлж байгаа аж. Цаашид үйлдвэрлэлийн хүчин чадлаа нэмэгдүүлэхийн зэрэгцээ агуулах, сав, барилга байгууламжийнхаа багтаамжийг өргөжүүлэхээр төлөвлөжээ.

Харин Борнуур сумын хэмжээнд энэ жил нийт 2700 га талбайд үр тариа, төмс, хүнсний болон тэжээлийн ургамал тариалсан байна. Үүнээс 1500 га-д тэжээлийн ургамал, 120 га-д үр тариа, 560 га-д төмс, 430 га-д байцаа, манжин, лууван, сонгино зэрэг хүнсний ногоо тариалжээ.

Энэ жилийн хувьд хур тунадас элбэг, цаг агаарын нөхцөл тариалалтад таатай байж, ургацын төлөв сайн байгаа талаар тариаланчид хэлж байна. Ийнхүү газар тариалангийн үйлдвэрлэл, малын тэжээлийн үйлдвэрлэлээ уялдуулан хөгжүүлснээр орон нутгийн мал аж ахуй, фермерийн аж ахуйн хэрэгцээг хангахын зэрэгцээ тэжээлийн хүртээмжийг нэмэгдүүлэх боломж бүрдэж байна.