Завхан аймагт шинэ ургацын хүнсний ногооны үнэ өмнөх оны мөн үеийнхээс 1 кг тутамд 500-800 төгрөгөөр нэмэгдэж, төмс, лууван, манжингийн үнэ 4000 төгрөгт хүрчээ.
Өнгөрсөн жил эдгээр ногоог 1 кг-ыг нь 3200-3500 төгрөгөөр худалдаж байсан бол энэ жил 500-800 төгрөгөөр нэмэгдсэн байна. Энэ нь өмнөх оны мөн үеийнхээс 14-25 хувиар өссөн үзүүлэлт юм.
Одоогоор өргөст хэмх 8000, таримал сонгино 6000, зэрлэг сонгино 15000 төгрөгийн үнэтэй байна. Харин Завханы онцлог бүтээгдэхүүн болох улаан хальст саримсны үнэ 1 кг нь 60000 төгрөгт хүрч, өмнөх оныхоос 20 хувиар өсжээ. Өнгөрсөн онд шинэ ургацын саримсыг талбай дээрээс 50000, зах, худалдааны төвд 55000 төгрөгөөр борлуулж байсан байна.
Аймгийн хэмжээнд энэ онд 210 га талбайд төмс, 137 га-д хүнсний ногоо тариалжээ. Ургац хураалтаар 2310 тонн төмс, 1644 тонн хүнсний ногоо авах зорилт тавьсан байна.
Завхан аймаг “Хүнсний хангамж, аюулгүй байдал” үндэсний хөдөлгөөний хүрээнд улаан хальст саримсны тариалалтыг нэмэгдүүлж, нутгийн онцлог бүтээгдэхүүн болгон хөгжүүлэхээр ажиллаж байна. Энэ хүрээнд 2026 оны хөгжлийн төлөвлөгөөнд “Завханы улаан хальст саримс” аймгийн дэд хөтөлбөрийг тусгаж, 7 га талбайд тариалалт хийж, 12.5 тонн ургац хураан авах зорилт дэвшүүлжээ.
Улаан хальст саримсны тариалалтыг нэмэгдүүлэхийн зэрэгцээ үрийн чанарыг сайжруулахад анхаарч, өмнөх жилүүдэд Улиастай, Алдархаан сумын тариаланчидтай үр үржүүлэх гэрээ байгуулсан байна. Үүний дагуу 26 аж ахуйн нэгж, иргэнд 88 кг үр олгож, 6 га талбайд тариалжээ. Мөн саримсны эрүүл үрийг үржүүлэх зорилгоор булцуунд нь вирусний шинжилгээ хийж, шинжилгээгээр эрүүл гарсан үрийг сонгон үржүүлэх ажил зохион байгуулсан байна.
Харин ургацын хадгалалт, борлуулалтын нөхцөлийг сайжруулах зорилгоор Улиастай, Тосонцэнгэл суманд тус бүр 1000 тонн багтаамжтай хүнсний ногооны зоорь байгуулахаар төлөвлөжээ. Зоорь ашиглалтад орсноор намрын ургацыг хадгалж, зах зээлд нийлүүлэх хугацааг уртасгах боломж бүрдэх юм.
Эх сурвалж: Монцамэ агентлаг
