Монголын хүнсний үйлдвэрлэлийн шинэ бүтээгдэхүүн, технологи, инновацыг нэг дороос танилцуулах “Foodex Mongolia 2026” олон улсын хүнсний үзэсгэлэн өнөөдөр Мишээл Экспо төвд нээлтээ хийлээ.
Энэ жилийн үзэсгэлэнгийн онцлог нь олон улсын оролцоо өмнөх жилүүдээс өргөжиж байгаа явдал. Зохион байгуулагчдын мэдээлснээр Монгол Улсаас гадна БНХАУ, ОХУ, БНСУ, Вьетнам, Тайвань, Япон, Чех, Азербайжан зэрэг улс, бүс нутгийн 100 гаруй байгууллага, хүнсний үйлдвэрлэгч, импортлогч, нийлүүлэгчид оролцож байгаа юм.
Есдүгээр сарын 4-6-ны өдрүүдэд үргэлжлэх тус үзэсгэлэн нь дотоодын үйлдвэрлэгч, импортлогч, нийлүүлэгч, худалдаа үйлчилгээний байгууллага болон хэрэглэгчдийг нэг дор холбож, хүнсний салбарын шинэ бүтээгдэхүүн, технологи, инновацыг танилцуулах зорилготой.
Өнгөрсөн жилийн үзэсгэлэнгийн нээлтэд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр оролцож, олон улсын хүнсний үзэсгэлэн Монголд зохион байгуулагдаж байгаа нь салбарын чухал үйл явдал болохыг онцолж байв.
Ч.Даваабаяр: “Олон улсын томоохон хүнс үйлдвэрлэгч компаниудын зохион байгуулдаг ‘FoodExpo’ Монголд зохион байгуулагдаж байгаад баяртай байна”
Тэрээр мөн ийм төрлийн олон улсын үзэсгэлэн нь Монголын үндэсний үйлдвэрлэгчдэд бүтээгдэхүүнээ сурталчлахын зэрэгцээ гадаадын үйлдвэрлэгчидтэй туршлага солилцох, шинэ технологи нэвтрүүлэх, цаашлаад экспортын зах зээлд гарах боломжийг нэмэгдүүлж байгааг онцолж байсан юм.
Энэ нь Монгол Улсын Ерөнхийлөгчийн санаачилгаар хэрэгжиж буй “Хүнсний хувьсгал” үндэсний хөдөлгөөний зорилттой ч уялдаж байна. Тус хөдөлгөөний хүрээнд дотоодын хүнсний үйлдвэрлэлийг нэмэгдүүлэх, импортыг орлох бүтээгдэхүүний нэр төрлийг өсгөхөөс гадна үндэсний үйлдвэрлэгчдийн өрсөлдөх чадварыг дээшлүүлж, цаашлаад экспортын боломжийг нэмэгдүүлэхэд анхаарч байгаа юм.
Тэгвэл энэ жилийн “Foodex Mongolia” үзэсгэлэнд “Хүнсний хувьсгал” хөдөлгөөний хүрээнд үйлдвэрлэл, үйл ажиллагаагаа өргөжүүлсэн үндэсний үйлдвэрлэгчид оролцож, бүтээгдэхүүн, үйлдвэрлэлийн ололтоо танилцуулж байна. Ингэснээр үйлдвэрлэгчид зөвхөн бүтээгдэхүүнээ хэрэглэгчдэд хүргэхээс гадна шинэ харилцагч, бизнесийн түнштэй болох, гадаадын үйлдвэрлэгчдийн технологи, туршлагаас суралцах, бүтээгдэхүүнийхээ өрсөлдөх чадварыг нэмэгдүүлэх, цаашлаад экспортын шинэ зах зээлд гарах боломжийг эрэлхийлж байна.
Өөрөөр хэлбэл, “Хүнсний хувьсгал”-ын хүрээнд бий болсон үйлдвэрлэл, бүтээгдэхүүний үр дүнг олон нийтэд таниулахаас гадна үндэсний үйлдвэрлэгчдийг дотоодын зах зээлээс олон улсын зах зээлд холбох дараагийн шатны боломжийг бүрдүүлж буйгаараа “Foodex Mongolia 2026” үзэсгэлэн онцлог болж байна.
Өнгөрсөн жилийн “Foodex Mongolia” үзэсгэлэн Хүннү Шоппинг Моллын үзэсгэлэнгийн танхимд гурван өдрийн турш зохион байгуулагдаж, хүнс, ундаа, мах, сүү, гурил, жимс, хүнсний ногоо, сав баглаа боодол, тоног төхөөрөмж зэрэг олон чиглэлийн 70 гаруй байгууллага оролцсон юм. Үзэсгэлэнгийн үеэр бүтээгдэхүүн танилцуулахаас гадна сургалт, семинар, хэлэлцүүлэг зохион байгуулж, үйлдвэрлэгчид шинэ харилцагч, бизнесийн түнш хайх боломж бүрдүүлсэн байна.
Харин 2024 оны үзэсгэлэнд 80 оролцогч, 6 мянга гаруй зочин оролцож байсныг Польшийн Худалдаа, хөрөнгө оруулалтын агентлаг мэдээлжээ. Энэ нь “Foodex Mongolia” жилээс жилд хүнсний салбарын үйлдвэрлэгчид, бизнес эрхлэгчид, хэрэглэгчдийг холбосон томоохон талбар болон өргөжиж байгааг харуулж байна.
Энэ ч утгаараа “Foodex Mongolia 2026” нь зөвхөн бүтээгдэхүүн худалдаалах, сурталчлах үзэсгэлэн бус, Монголын хүнсний үйлдвэрлэлийг олон улсын зах зээлтэй холбох, үндэсний үйлдвэрлэгчдийн өрсөлдөх чадварыг нэмэгдүүлэх бизнесийн чухал талбар болж байгаа юм.
“Foodex Mongolia 2026” үзэсгэлэн есдүгээр сарын 4-6-ны өдрүүдэд Мишээл Экспо төвд үргэлжилж, олон нийтэд нээлттэй, үнэ төлбөргүй зохион байгуулагдаж байна.
