Монгол Улсын Ерөнхийлөгч Ухнаагийн Хүрэлсүхийн санаачилгаар орон даяар хэрэгжиж буй “Хүнсний хангамж-аюулгүй байдал” үндэсний хөдөлгөөний хүрээнд УИХ-аас 36-р тогтоолыг батлан гаргасан. Энэ хүрээнд 20 гаруй төрийн байгууллагууд уялдаа холбоотой, хамтарч ажиллахаа илэрхийлж байгаа бөгөөд нутгийн захиргааны байгууллагууд, олон улсын байгууллага, хувийн хэвшил, үйлдвэрлэгчид нэгдэж эхэллээ.
Монгол Улсын Ерөнхийлөгчийн зөвлөх болон Ерөнхийлөгчийн Тамгын газрын Хүнсний төсөл, хөтөлбөр хариуцсан ажлын албаны төлөөлөгчид 36-р тогтоолын хүрээнд хэрэгжүүлэх арга хэмжээнүүдийг хамтран хэрэгжүүлэх үүрэгтэй орон нутгийн засаг захиргааны нэгжүүдэд танилцуулж байна. Нэг сарын хугацаанд нийт 27 төрийн байгууллага, 10 гаруй үйлдвэрлэгч, баялаг бүтээгч, 8 олон улсын байгууллагатай уулзалт зохион байгуулаад байна.
Монгол улсын Аймаг, нийслэлийн Засаг дарга нутаг дэвсгэрийнхээ хэмжээнд энэ хуулийн 6.2-т заасан журмын дагуу стратегийн хүнсний улирлын нөөц бүрдүүлэх, зарцуулах арга хэмжээг авч хэрэгжүүлнэ
(Хүнсний тухай хуулийн 6.3)
Нутаг дэвсгэрийнхээ хүн амыг стратегийн хүнсээр тогтвортой, хүртээмжтэй хангах арга хэмжээг тухайн шатны Засаг дарга авч хэрэгжүүлнэ
(Хүнсний тухай хуулийн 6.5)
Тэгвэл өнөөдөр Хөвсгөл аймгийн Засаг даргын тамгын газартай уулзаж, хэрэгжүүлэх арга хэмжээнүүдийн талаар ярилцаж, санал солилцлоо.
Уулзалтад Хөвсгөл аймгийн Засаг даргын тамгын газрыг төлөөлөн:
- Хөвсгөл Аймгийн Засаг даргын орлогч М.Хуягбаатар
- Хөвсгөл аймгийн Хүнс, хөдөө аж ахуйн газрын дарга Я.Эрхэмбаяр
- Баялаг бүтээгчдийг дэмжих холбооны Хөвсгөл аймаг дахь салбар хороон дарга Г.Сүхбаатар
Хүнсний төсөл, хөтөлбөр хариуцсан албыг төлөөлөн:
- Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр
- Хүнсний төсөл, хөтөлбөр хариуцсан албаны Хүнсний мэргэжилтэн А.Амаржаргал нар оролцлоо.
Мөн энэ өдөр Монгол Улсын Ерөнхийлөгч Ухнаагийн Хүрэлсүхийн санаачилгаар хэрэгжиж буй “Хүнсний хангамж, аюулгүй байдал” үндэсний хөдөлгөөний орон нутаг дахь хэрэгжилтийг эрчимжүүлэх, иргэдийн оролцоог идэвхжүүлэх зорилгоор “Хүнсний хувьсгал” анхдугаар зөвлөгөөн Хөвсгөл аймагт эхэллээ.
Зөвлөгөөнийг Ерөнхийлөгчийн Тамгын газар, Хүнс, хөдөө аж ахуй, хөнгөн үйлдвэрийн яам, Хөвсгөл аймгийн Засаг даргын Тамгын газар, Хөвсгөл аймгийн Хүнс хөдөө аж ахуйн газар, сумдын Засаг даргын тамгын газартай хамтран зохион байгууллаа.
“ Хөвсгөл аймагт газар тариалангийн үйлдвэрлэл эрхэлж буй 72 аж ахуйн нэгж, 567 хувиараа хөдөлмөр эрхлэгч иргэд байна. Үүнээс 400 гаруй иргэн газар тариалан, 220 гаруй иргэн хүлэмжийн аж ахуй эрхэлж байна.”
Хөвсгөл аймаг 100,629 (нэг зуун мянга зургаан зуу) гаран ам дөрвөлжин километр газар эзэлсэн Монгол улсын 6 дахь том газар нутагтай. Амьтан ургамал, ашигт малтмалаар баялаг, онгон дагшин байгалийн өлгий болсон тус нутаг гар урлал, хүнсний ногоо, оёмол бүтээгдэхүүн, модон эдлэл, сүү цагаан идээ, эсгий урлал, бэлэг дурсгал гээд 380 гаруй төрлийн бүтээгдэхүүн үйлдвэрлэдэг Баялаг бүтээгчдийн өлгий нутаг юм. Дашрамд дурдахад Хөвсгөл аймаг 2022 оныг “Хөдөлмөр эрхлэлтийг дэмжих жил” болгон зарласан.