Монгол Улсын Ерөнхийлөгч Ухнаагийн Хүрэлсүхийн санаачилгаар орон даяар хэрэгжиж буй “Хүнсний хангамж-аюулгүй байдал” үндэсний хөдөлгөөний хүрээнд УИХ-аас 36-р тогтоолыг батлан гаргасан. Энэ хүрээнд 20 гаруй төрийн байгууллагууд уялдаа холбоотой, хамтарч ажиллахаа илэрхийлж байгаа бөгөөд нутгийн захиргааны байгууллагууд, олон улсын байгууллага, хувийн хэвшил, үйлдвэрлэгчид нэгдэж эхэллээ.
Монгол Улсын Ерөнхийлөгчийн зөвлөх болон Ерөнхийлөгчийн Тамгын газрын Хүнсний төсөл, хөтөлбөр хариуцсан ажлын албаны төлөөлөгчид 36-р тогтоолын хүрээнд хэрэгжүүлэх арга хэмжээнүүдийг хамтран хэрэгжүүлэх үүрэгтэй орон нутгийн засаг захиргааны нэгжүүдэд танилцуулж байна. Нэг сарын хугацаанд нийт 27 төрийн байгууллага, 10 гаруй үйлдвэрлэгч, баялаг бүтээгч, 8 олон улсын байгууллагатай уулзалт зохион байгуулаад байна.
Өнөөдөр Булган аймгийн Хүнс, хөдөө аж ахуйн газартай уулзаж, хэрэгжүүлэх арга хэмжээнүүдийн талаар ярилцаж, санал солилцлоо.
Уулзалтад Булган аймгийн Хүнс, хөдөө аж ахуйн газрыг төлөөлөн:
- Булган аймгийн Хүнс, Хөдөө аж ахуйн газрын дарга Ч.Амгалан
Хүнсний төсөл, хөтөлбөр хариуцсан албыг төлөөлөн:
- Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр,
- Хүнсний төсөл, хөтөлбөр хариуцсан албаны Хүнсний мэргэжилтэн А.Амаржаргал
- ХХААХҮЯ-ны Хүнсний үйлдвэрлэлийн бодлого хэрэгжилтийг зохицуулах газрын дарга Д.Довчинсүрэн,
- Зээлийн батлан даалтын сангийн Батлан даалтын газрын дарга А.Амаржаргал нар оролцлоо.
Булган аймгийн эдийн засгийн үндсэн суурь нь хөдөө аж ахуйн салбар бөгөөд дотоодын нийт бүтээгдэхүүний 63 хувийг энэ салбараас бүрдүүлж байна.
Мал аж ахуйн салбараас жилдээ ямааны ноолуур 309,8 тн, хонины ноос 1942,1 тн, тэмээний ноос 4,3 тн, арьс шир 792,8 мянган ширхэг, мах 55334,3 тн, сүү 41,230,3 мянган литр үйлдвэрлэж байгааг мөнгөн дүнгээр тооцож үзвэл 293,5 тэрбум төгрөгийн борлуулалт хийж байна.
Аймгийн хэмжээнд 88 аж ахуйн нэгж, 800 гаруй өрхийн тариаланчид ажиллаж байна. Жилд нэгжээс дунджаар 14.6 цн үр тариа, 110.0 цн төмс, 100 цн хүнсний ногоо хураан авч, аймгийнхаа дотоодын хэрэгцээг хүнсний ногоогоор 70 хувь, төмс, гурилаар 100 хувь хангаж байна. Гэвч хангайн бүсийн аймгуудын төмс, хүнсний ногооны хэрэгцээг бүрэн хангахын тулд газар тариалангийн үйлдвэрлэлд шинэ техник, технологи нэвтрүүлэх ажлыг эрчимжүүлж, усалгаатай талбайн хэмжээ, нэгжээс авах ургацыг нэмэгдүүлэх, зоорь, хүлэмжийн аж ахуйг хөгжүүлэх шаардлагатай гэдгийг аймгийн хүнс, хөдөө аж ахуйн газрын дарга Ч.Амгалан хэллээ