Дэлхийн улс орнууд хүнсний баталгаат байдлаа сайжруулахад онцгой анхаарч байгаа энэ цаг үед Монгол Улсын Ерөнхийлөгч Ухнаагийн Хүрэлсүх “Хүнсний хангамж, аюулгүй байдал”-ын бодлого, зохицуулалтыг үндэсний хэмжээнд эрс сайжруулах санаачилга гаргаж, 5 жилийн хугацаанд хэрэгжих үндэсний хөдөлгөөнийг орон даяар өрнүүлээд байгаа.
Ерөнхийлөгчийн санаачилгыг хүнс үйлдвэрлэгчид, баялаг бүтээгчид түүчээлэн дэмжиж “Хүнсний хангамж, аюулгүй байдал” үндэсний хөдөлгөөнд нэгдсээр байна. Өнөөдөр Монголын анхны сүүний кластер фермийг санаачлагч “Нүүдэлчин Агро Ферм” компани ХҮНСНИЙ ХУВЬСГАЛ-д нэгдлээ.
“Нүүдэлчин Агро Ферм” компани анх 2018 онд Төв аймгийн Баяндэлгэр сумын нутагт тус бүр 40 саалийн үнээтэй өрхүүд нэгдэн, нийт 400 үнээтэй 10 ферм бүхий Монголын анхны сүүний кластер фермээ байгуулж, үйл ажиллагаагаа эхлүүлж байжээ.
Шингэн сүү бэлтгэл, фермийн аж ахуйг олон улсын жишгийн дагуу хөгжүүлэх зорилготой сүүний кластер фермийн төсөл нь Төв аймгийн Баяндэлгэр сумын Тогосын голд, Жирмийн цагаан нуур, Хүй 7 худагт байрлах фермерүүдэд хэрэгжиж байна.
Манай улсын шингэн сүүний бэлтгэн нийлүүлэлт улирлын хамааралтай явж ирсэн. Тиймээс энэ салбарыг бодлогоор дэмжих, европ стандартын тэр дундаа кластер фермийг олноор бий болгох шийдэл дээр энэхүү төслийг хэрэгжүүлэгч “Нүүдэлчин агро Ферм” компани ихээхэн анхаарч байна.
1.2 сая еврогийн сайн үүлдрийн үхэр импортлох гэрээг үзэглэв
Дашрамд дурдахад аравдугаар сарын 4-7-ны өдрүүдэд европын хамгийн том мал аж ахуйн үзэсгэлэн болох “Sommet de l’Elevage” арга хэмжээ Франц улсад зохион байгуулагдсан. Үзэсгэлэнд Монгол Улс “Хүндэт зочин” орноор уригдаж, Монгол Улсын Хүнс, хөдөө аж ахуй, хөнгөн үйлдвэрийн яамны төлөөлөгчид болон хувийн хэвшлийн өргөн бүрэлдэхүүнтэй баг оролцсон.
Үзэсгэлэнд монголын хувийн хэвшлийн төлөөлөл “Нүүдэлчин агро ферм” компани Францын “Эважура” компанитай 1.2 сая еврогийн сүү-махны чиглэлийн 320 үхрийг урт хугацаатай, хүүгүй зээлээр авах гэрээ байгуулсан. Энэ нь Монгол, Францын хөдөө аж ахуйн салбар дахь хамтын ажиллагаа зөвхөн хоёр орны Засгийн газрын түвшинд бус аж ахуйн нэгж, бизнес эрхлэгчдийн түвшинд өргөжин хөгжиж байгааг харуулсан томоохон жишээ болсон юм.
