Улс орон даяар өрнөж буй “Хүнсний хувьсгал” үндэсний хөдөлгөөний нээлт өнөөдөр Төв аймагт боллоо.
Уг арга хэмжээнд
- Монгол Улсын Ерөнхийлөгчийн ахлах зөвлөх С.Лүндэг,
- Монгол Улсын Ерөнхийлөгчийн Хот, хөдөөгийн хөгжлийн бодлогын зөвлөх О.Буяннэмэх,
- Улсын Их Хурлын гишүүн Ж.Батжаргал,
- Төв аймгийн Засаг дарга Д.Мөнхбаатар,
- Төв аймгийн Иргэдийн төлөөлөгчдийн хурлын дарга Ц.Жамбалсүрэн,
- Хүнс, хөдөө аж ахуй, хөнгөн үйлдвэрийн яамны Бодлого төлөвлөлтийн газрын дарга Ц.Болорчулуун болон аймаг, сумын ИТХ-ын төлөөлөгч, аймгийн ЗДТГ-ын хэлтэс, харьяа агентлагийн дарга нар, сумдын удирдлагууд, малчид, тариаланчид, үйлдвэрлэл үйлчилгээ эрхлэгч аж ахуйн нэгж, хоршооны төлөөлөл оролцлоо.
“Хүнсний хангамж-Аюулгүй байдал” үндэсний хөдөлгөөнийг аймгийн ИТХ-ын дарга Ц.Жамбалсүрэн нээж үг хэлсэн бол Монгол Улсын Ерөнхийлөгчийн мэндчилгээг Ерөнхийлөгчийн хот, хөдөөгийн бодлогын зөвлөх О.Буяннэмэх уншиж танилцуулан, аймгийн Засаг дарга Д.Мөнхбаатарт гардууллаа.
Үүний дараа УИХ-ын гишүүн Ж.Батжаргал “Хүнс, хөдөө аж ахуй, хөнгөн үйлдвэрийн салбарын эрх зүйн орчныг сайжруулах тухай” илтгэл, ХХААХҮЯ-ны Бодлого төлөвлөлтийн газрын дарга Ц.Болорчулуун “Хүнсний хангамж, аюулгүй байдлын талаар авах зарим арга хэмжээний тухай” 36 дугаар тогтоолыг хэрэгжүүлэх арга хэмжээний төлөвлөлтийн тухай илтгэл, Төв аймгийн Засаг дарга Д.Мөнхбаатар “Хүнсний хангамж-Аюулгүй байдал” үндэсний хөдөлгөөн, “Хүнсний хувьсгал”-д Төв аймгийн оролцоо, аймгийн “Хөдөө аж ахуй, үйлдвэрлэлийн стратеги төлөвлөлт”-тэй хэрхэн уялдуулах” талаар илтгэл мэдээлэл хүргэлээ.
Төв аймагчууд “ХҮНСНИЙ ХУВЬСГАЛ” хийж, Монгол улсын Засгийн газрын Хүнс экспортлогч улс болох зорилтыг хангах ТҮШИЦ АЙМАГ, НИЙЛҮҮЛЭГЧ АЙМГААС ҮЙЛДВЭРЛЭГЧ АЙМАГ БОЛОХОД бодлого, зорилтоо дэвшүүлэн, хэрэгжүүлэн ажиллаж байна.
Төв аймаг жилд 100.0 сая литр сүү, 50.0 мянган тонн мах, 21.0 мянган тонн хүнсний ногоо, 154.5 мянган тонн төмс, 172.3 мянган тонн жимс жимсгэнэ үйлдвэрлэж, хүн амын хүнсний хэрэгцээнд нийлүүлдэг. Мөн өөрийн хэрэгцээг хангаад зогсохгүй нийслэл Улаанбаатар хотын хүн амын сүүний хэрэгцээний 45 хувь, махны 40 хувь, төмс, хүнсний ногооны 56.6 хувийг хангаж байна. Түүнчлэн үр тарианы 26 хувь, хүнсний ногооны 18 хувь, төмсний 57 хувийг үйлдвэрлэж байна.
