Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр ’’Хүнсний хангамж, аюулгүй байдал’’ үндэсний хөдөлгөөний хүрээнд UNIDO-ын хэрэгжүүлж байгаа төслийн талаар болон УИХ-аас баталсан 36-р тогтоолын бодлого, арга хэмжээний төлөвлөгөөний талаар санал солилцох уулзалт хийлээ.
Уулзалтад НҮБ-ын Аж үйлдвэр хөгжлийн байгууллага (ЮНИДО)-ыг төлөөлөн:
- НҮБ-ын Аж үйлдвэр хөгжлийн байгууллага (ЮНИДО)-ын Хөтөлбөрийн зохицуулагч Г.Мөнхболор,
- ЮНИДО-ын Ноос, ноолуурын мэргэжилтэн, Хөнгөн үйлдвэрийн судалгаа, хөгжлийн хүрээлэнгийн Эрдэм шинжилгээний ажилтан Г.Батчимэг,
- Монголын Арьс шир үйлдвэрлэлийн холбооны Гүйцэтгэх захирал Т.Баярсайхан,
ЕТГ – ын Хүнсний төсөл, хөтөлбөр хариуцсан албыг төлөөлөн:
- Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр,
- ЕТГ-ын Хүнсний төсөл, хөтөлбөр хариуцсан ажлын албаны Гадаад харилцааны мэргэжилтэн Р.Будмаа нар оролцлоо.
НҮБ-ын Аж үйлдвэр хөгжлийн байгууллага (ЮНИДО) нь Монгол Улсын Засгийн газартай хамтран 1970 оноос хойш манай улсад тогтвортой, хамтын оролцоотой аж үйлдвэрийг хөгжүүлэх чиглэлээр төсөл, хөтөлбөрүүдийг хэрэгжүүлж ирсэн.
2022 оны 10-р сарын 3-5-ны өдрүүдэд Австри улсын Вена хотод НҮБ-ын Аж үйлдвэр хөгжлийн байгууллага (UNIDO), Австрали улсын Засгийн газар болон Стандарт, худалдааны хөгжлийн байгууллага (STDF) хамтран “Хүнсний аюулгүй байдлын Венийн олон улсын форум” зохион байгуулсан.
Уг форум цахим болон танхимаар болж дэлхийн 160 гаруй орны төлөөлөгчид ЮНИДО-ын Төвд хүрэлцэн ирсэн бөгөөд зайнаас аудит хийх, баталгаажуулах, эрүүл мэндийн цахим гэрчилгээ, хөндлөнгийн баталгаажуулалтын хөтөлбөрүүд зэрэг хүнсний аюулгүй байдлыг хангах орчин үеийн шийдлүүдийг онцлон танилцуулж хэлэлцэв. Форумд Хүнс, хөдөө аж ахуй, хөнгөн үйлдвэрийн яам (ХХААХҮЯ)-ны төлөөллүүд оролцсон бөгөөд НҮБ-ын Аж үйлдвэр хөгжлийн байгууллагын удирдлагууд хүнсний аюулгүй байдал, итгэмжлэл, баталгаажуулалтын чиглэлээр олон улсын форум арга хэмжээг Монгол Улсад зохион байгуулах саналыг ХХААХҮЯ-д тавьсан.
Форумын дараа ХХААХҮЯ-ны болон Монгол Улсаас НҮБ-ын дэргэд суугаа Байнгын төлөөлөгчийн газрын төлөөллүүд НҮБ-ын Аж үйлдвэр хөгжлийн байгууллагын удирдлагуудтай албан уулзалт хийж хоёр талын хооронд байгуулсан “Стратегийн хамтын ажиллагааны хүрээ”-ний дагуу боловсруулж буй Ажлын нарийвчилсан төлөвлөгөө болон УИХ-ын 36-р тогтоолоор батлагдсан “Хүнсний хангамж, аюулгүй байдлыг хангах талаар авах зарим арга хэмжээг хэрэгжүүлэх төлөвлөгөө”-нд тусгагдсан ажлуудаас хамтарч хэрэгжүүлэхээр хэлэлцсэн байна.
