Түншүүд ба донор байгууллагууд: Байгаль орчин, аялал жуулчлалын яам; Цөлжилттэй тэмцэх НҮБ-ын конвенц
Хэрэгжих хугацаа: 2019 – 2022
Төслийн зорилго: Элсэн ба шороон шуурганы эрсдэл, нөлөөллийг бууруулах газрын тогтвортой менежмент явуулах чадавхыг бэхжүүлэх.
Байршил: Дорноговь аймгийн Замын-Үүд сум
Монголчууд сүүлийн жилүүдэд уламжлалт нүүдэлчин амьдралаас хот суурин амьдрал руу эрчимтэй шилжиж байна. Хүн амын бөөгнөрөл хамгийн багатай орны хувьд Монгол орон газрын зөв менежментийг хурдацтай өөрчлөгдөж буй өнөөгийн нийгэмд амжилттай явуулахад олон бэрхшээлтэй тулгарч байна. Тиймээс газрын тогтвортой менежментийг нэвтрүүлэх, газрын доройтлыг арилгахад олон нийтийн оролцоог нэмэгдүүлэх арга замыг ашиглах шаардлагатай.
Төслийн үндэслэл
Монгол орны хуурай бүс нутагт агаарын хэмийн хэлбэлзэл ихсэж, хур тунадас багасаж, ган тохиож уур амьсгалын өөрчлөлтийн сөрөг нөлөө нэмэгдсээр байна. Түүнчлэн бэлчээрийн хэт ашиглалт, хүн амын хот төв суурин бараадах шилжилт хөдөлгөөн, уул уурхай тэдгээрийг дагасан зам тээвэр элсэн шороон шуурганаас үүдэлтэй эрсдэлийг улам бүр нэмэгдүүлсээр байна. Төслийн туршилтын арга хэмжээг хэрэгжүүлэхээр сонгож буй Замын-Үүдийн хувьд ялангуяа хүн ам нэмэгдэж, БНХАУ, Монгол улс хоорондын худалдаа өргөжин, улсын хил дагуу ачаа тээвэр нэмэгдэхийн хэрээр газрын доройтол, ялангуяа цөлжилтөд илүү өртөж байгаа газруудын нэг болж байна.
Үйл ажиллагаа
Энэхүү төсөл нь цөлжилтийг бууруулах зорилтын хүрээнд элсэн болон шороон шуурганаас хамгаалахад ард иргэд, аж ахуй нэгж болон төрийн бус байгууллагуудын оролцоог нэмэгдүүлэх, тэдэнд энэ чиглэлийн мэдлэг, мэдээлэл өгөх тал дээр анхаарал хандуулан ажиллаж байна.
- Цөлжилтөд эрчимтэй өртөж байгаа газруудад мод тарих, ургамалжуулах, төв суурин газрууд болон нийгмийн чухал ач холбогдолтой дэд бүтэц, барилга байгууламжийг элсний нүүлт, газрын элэгдэл, эвдрэлээс хамгаалах
- Цөлжилттэй тэмцэхэд иргэд, аж ахуй нэгжийн оролцоог нэмэгдүүлэх, урамшуулахад чиглэсэн олон нийтийн арга хэмжээг зохион байгуулах, эмэгтэйчүүдийн оролцоог дэмжих
- Элсэн ба шороон шуурганы эрсдэл, нөлөөллийг бууруулах, цөлжилттэй тэмцэх зорилгоор аж үйлдвэр, дэд бүтцийн бүтээн байгуулалтын нөлөөгөөр доройтсон газар нутгийг сайжруулахад байгальд хоргүй нөөц зүйлсийг түлхүү ашиглахад иргэдийг уриалах
