Үндэсний үйлдвэрлэгчдийг түшиглэн эх орондоо хүнсний хувьсгал хийх зорилготой “Хүнсний хангамж, аюулгүй байдал” үндэсний хөдөлгөөний хүрээнд Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр “Гофро” ХХК-ийн цаасан хайрцагны үйлдвэрт ажиллалаа.
Хүмүүн капиталыг дээдэлж, инновацид суурилсан менежментийн тогтолцоог хөгжүүлэн үндэсний шилдэг үйлдвэрлэгч болох зорилготой “Гофро” ХХК нь 2012 онд дотоодын цаасан хайрцаг сав баглаа боодлын хэрэгцээг хангахаар дунд оврын тоног төхөөрөмжтэйгээр анх байгуулагдсан. 2014 онд шинэ үйлдвэрийн барилга ашиглалтад оруулж, олон улсын стандарт бүхий орчин үеийн дэвшилтэт технологитой бүрэн автомат тоног төхөөрөмжүүдийг суурилуулан хүчин чадал, бүтээмж, ажлын байраа нэмэгдүүлсэн байна.
Өнөөдрийн байдлаар байдлаар 100 гаруй чадварлаг ажилтан, албан тушаалтнуудыг эрүүл, аюулгүй ажиллах орчин нөхцөл бүхий байнгын ажлын байраар ханган ажиллаж, 104 байнгын харилцагчтай, өдөрт 25-50 мянган ширхэг цаасан хайрцаг үйлдвэрлэх хүчин чадалтай үйл ажиллагаагаа явуулж байна. Үүнээс гадна чанарыг эрхэмлэн ОХУ-ын Сибирийн ойн царс модоор хийсэн түүхий эд ашиглан, байгаль орчинд сөрөг нөлөөгүй, хаягдалгүй үйлдвэрлэл эрхэлж, Олон улсын Чанарын удирдлагын тогтолцоо ISO 9001:2015 стандарт болон Хөдөлмөрийн эрүүл мэнд, аюулгүй байдал OHSAS:18001 стандартыг нэвтрүүлсэн байна.
Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр:
Эрүүл, аюулгүй хүнс үйлдвэрдлэхэд стандартын шаардлага хангасан, чанартай сав баглаа боодол чухал байр суурь эзэлнэ. Монгол Улсад сав баглаа боодлын салбар хөгжихөд төр засгийн дэмжлэг зайлшгүй шаардлагатай байна. Монгол Улсын Ерөнхийлөгч У.Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөн нь хүнс, хөдөө аж ахуйн салбарын асуудлыг томоор харж, шийдвэрлэхээр зорьж байгаа. Хэрэгжиж эхэлсэн хагас жилийн хугацаанд эрх зүйн орчноо бүрдүүлэх замаар санхүүгийн асуудлыг ч мөн шийдвэрлэсэн. Тодруулбал 2022 оны 06 дугаар сарын 17-ны өдөр хүнсний хувьсгалын хүрээнд УИХ 36-р тогтоолыг батлан гаргасан юм. Тус тогтоолд Хүнсний түүхий эд, бүтээгдэхүүнийг стандартын шаардлага хангасан зориулалтын агуулах, зооринд хадгалах, бүртгэлийн нэгдсэн тогтолцоог бий болгох, хатаах, хөлдөөх, нөөшлөх бага, дунд оврын тоног төхөөрөмжийн нийлүүлэлтийг дэмжих, хүнсний сав, баглаа боодлын дотоодын үйлдвэрлэлийг хөгжүүлэх, хүнсний боловсруулах үйлдвэрийн хүчин чадлыг бүрэн ашиглах, тоног төхөөрөмжийн шинэчлэл хийх замаар бүтээгдэхүүний амт чанар, сав, баглаа боодлыг сайжруулах, нэр төрлийг нэмэгдүүлэн экспортын зориулалтын брэндийг хөгжүүлэх, үйлдвэрийн үйл ажиллагааг нь тогтвортой явуулахад эргэлтийн хөрөнгөөр дэмжихээр тусгасан. “Гофро” компани нь монголын цаасан хайрцагны зах зээлийн дийлэнх хувийг хангаж байгаа томоохон үйлдвэр тул тус тогтоолыг хэрэгжүүлэхэд чухал ач холбогдолтой юм.
“Гофро” ХХК-ийн Гүйцэтгэх захирал П.Батчимэг:
Миний хувьд үйлдвэр, үйлчилгээний салбарт олон жил ажилласан. Энэ хугацаанд монголын үндэсний үйлдвэрлэгч, баялаг бүтээгчид бор зүрхээрээ зүтгэж байж ажлын байр бий болгон, эх орныхоо хөгжилд хувь нэмэр оруулдаг гэдгийг ойлгосон. Ялангуяа 2012 оноос эхлэн цаасан хайрцаг үйлдвэрлэж эхлэх үед төр засгийн бодлого их дутагдаж байлаа. Маш олон төрийн байгууллагад хандан манай үйлдвэртэй танилцахыг санал болгосон ч хэн ч ирж байгаагүй. Гэтэл энэ цаг үед Монгол Улсын Ерөнхийлөгч У.Хүрэлсүхийг төлөөлөн Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр манай үйлдвэрт ирж ажилласанд их гайхаж бас баярлаж байна. Монголын төрийн тэргүүн баялаг бүтээгчдээ дэмжиж, бидний асуудлыг шийдэхээр идэвхтэй ажиллаж байгааг сонсоод үнэхээр их найдлага төрж байна. Бид эх орондоо хүнсний хувьсгал хийхэд нэгдэж ажиллах болно.
