Монгол Улсын Ерөнхийлөгч Ухнаагийн Хүрэлсүх XVII жарны “Үзэсгэлэн болгогч” хэмээх усан туулай жилийн Цагаан сарын баярыг тохиолдуулан үндэсний үйлдвэрлэгч, баялаг бүтээгчдэд төрийн дээд цол, одон, медаль хүртээлээ.
Орон даяар идэвхтэй өрнөж буй “Хүнсний хангамж, аюулгүй байдал” үндэсний хөдөлгөөний хүрээнд үндэсний үйлдвэрлэгчдийг түлхүү дэмжинэ гэдгээ Монгол Улсын Ерөнхийлөгч У.Хүрэлсүх илэрхийлсэн. Энэ хүрээнд хэд хэдэн ажил хэрэгжүүлсэн бөгөөд үүний нэг нь олон жил улс, эх орныхоо хөгжилд үнэтэй хувь нэмэр оруулсан үндэсний үйлдвэрлэгчдийн хөдөлмөрийг үнэлэх явдал байв. Иймд 2023.02.17-ны өдөр МУ-ын Ерөнхийлөгчийн зарлигаар Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр 30 гаруй үйлдвэрийн 48 баялаг бүтээгчдэд шагнал олголоо.
Мөн “Баялаг бүтээгчдийг дэмжих холбоо”-ны Удирдах зөвлөлийн гишүүн, “Чиглэл” ХХК-ийн захирал Ц.Бумцэндийг Аж үйлдвэрийн гавьяат ажилтан, “Баялаг бүтээгчдийг дэмжих холбоо”-ны гишүүн, “Үр минь брэндийг Үүсгэн байгуулагч А.Уянгыг Хөдөлмөрийн хүндэт медалиар тус тус шагнаж, импортыг орлох бүтээгдэхүүн үйлдвэрлэж, хэрэглэгчээ дээдлэн салбартаа тэргүүлэн ажиллахын зэрэгцээ ажлын байрыг ихээр бий болгосон хөдөлмөрийг нь үнэлсэн юм.
“Хүнсний хувьсгал”-ын хүрээнд Ерөнхийлөгч болон Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр нар нийтдээ 100 орчим үйлдвэрт ажиллаж, санал хүсэлтийг нь сонссон. Үүнийгээ үр дүнд хүргэн эхний ээлжинд бага хүүтэй, урт хугацаатай зээлээр ХХАА-н салбарын үйлдвэрлэгчдийг дэмжиж байна. Мөн дараагийн шатны ажлуудыг хэрэгжүүлэхэд бэлэн болсон. Тухайлбал дотоодын бүтээгдэхүүнээ хамгаалах зорилгоор импортын барааны татварыг үе шаттай нэмэгдүүлэх, үндэсний үйлдвэрлэгчдийн бараа бүтээгдэхүүний хэрэглээг нэмэгдүүлэх зэрэг ажил төлөвлөж байна.
Монгол төрийн бодлогын гол цөм нь монгол хүн байж, монгол хүнийг ажилтай орлоготой байлгахад хувь нэмэр оруулж буй үндэсний үйлдвэрлэгчдийг дэмжиж, хүнсний хувьсгал цаашлаад аж үйлдвэрийн хувьсгал хийх нь төрийн тэргүүний зорилт гэдгийг илэрхийлээд байна.
