Үндэсний үйлдвэрлэгчид, баялаг бүтээгчдэд зориулсан худалдан авах ажиллагаа зохион байгуулах болон худалдан авах ажиллагаанд оролцоход анхаарах ёстой асуудлын талаарх сургалт болно.
Монгол Улсын Ерөнхийлөгч У.Хүрэлсүх 2023.03.03-нд зохион байгуулагдсан “Хүнс, хөдөө аж ахуйн салбарын баялаг бүтээгчдийн зөвлөгөөн”-д Хүнсний хувьсгал”-ын хүрээнд хэрэгжүүлэх зургаан зорилтыг танилцуулсан. Тэрээр хэлсэн үгэндээ, “Хүнсний хувьсгал”-ын хэрэгжилтийн хүрээнд цаашид төр, хувийн хэвшлийн зүгээс дараах асуудлуудад анхаарч, хамтран ажиллах шаардлагатай гэж үзэж байгаагаа онцолж байв. Тодруулбал:
- Хөдөлгөөний хэрэгжилтийг улс орны хөгжлийн бодлого, түүн дотроо бүсчилсэн хөгжлийн бодлоготой зөв уялдуулах, хүнс, хөдөө аж ахуйн кластеруудыг бодлогоор хөгжүүлэх, хүнсний үйлдвэрлэлийн цогцолборуудыг байгуулах, түүхий эд бэлтгэн нийлүүлэлтийн тогтолцоо, тээвэр логистикийн оновчтой сүлжээг шинжлэх ухаанчаар төлөвлөн хэрэгжүүлэх;
- Дотоодын хүнс, хөдөө аж ахуйн бараа, бүтээгдэхүүнийг дэмжих, хамгаалах эдийн засгийн зөв арга хэрэгслийг ашиглах, хүнс үйлдвэрлэгчид, баялаг бүтээгчдээ хамгаалах, хөгжүүлэх эрх зүйн орчныг сайжруулах;
- Таван жилийн дотор малын өвчингүй эрүүл бүс болоход шаардлагатай вакцинжуулалт, био-бэлдмэлийн үйлдвэрлэлийг хөгжүүлэх зэрэг суурь асуудлуудыг шийдвэрлэж, 2023 онд тодорхой бодит ахиц дэвшил гаргах;
- Хязгаарлагдмал төсөв, хөрөнгийн нөөц боломжоо бүрэн дүүрэн, үр дүнтэй ашиглаж, зээл санхүүжилт, татвар, даатгал зэрэг эдийн засгийн оновчтой, хүртээмжтэй хөшүүрэг ашиглах, урамшууллын тогтолцоог боловсронгуй болгох, хувийн хэвшлийн хөрөнгө оруулалт, хамтын ажиллагааг дэмжих;
- Төрийн худалдан авалтын бодлогыг эх оронч худалдан авалтад чиглүүлж, ард иргэд, аж ахуйн нэгжүүдэд үндэсний үйлдвэрлэлээ дэмжих хандлагыг төлөвшүүлэх;
- “Хүнсний хангамж, аюулгүй байдал” үндэсний хөдөлгөөний гүйцэтгэл, хүрэх үр дүнг жил бүрээр нарийвчлан төлөвлөж, бодит үр дүнг олон нийтэд хагас жил тутам тайлагнах нь зүйтэй хэмээв.
Төрийн тэргүүний санаачилсан “Хүнсний хувьсгал” үндэсний хөдөлгөөний хүрээнд болон Засгийн газрын 2020-2024 оны үйл ажиллагааны хөтөлбөрийн хүрээнд Засгийн газрын хэрэгжүүлэгч агентлаг Төрийн худалдан авах ажиллагааны газраас үндэсний үйлдвэрлэгчид, баялаг бүтээгчдэд худалдан авалтын талаар танилцуулга мэдээлэл өгч, санал солилцоно.
Сургалтын зорилго нь нэг талаас УИХ-ын 2022 оны “Хүнсний хангамж, аюулгүй байдлыг хангах талаар авах зарим арга хэмжээний тухай” 36 дугаар тогтоолын хэрэгжилтийг хангах, нөгөө талаас дотоодын үйлдвэрлэлийг төрийн худалдан авах ажиллагаагаар дэмжих ажлын хүрээнд жижиг, дунд үйлдвэрлэл эрхлэгчдэд төрийн худалдан авах ажиллагааны эрх зүйн орчин, цахим систем, төрийн байгууллагуудад бараа бүтээгдэхүүн нийлүүлэхтэй холбоотой дотоодын үйлдвэрүүдэд тулгамдаж буй асуудлыг хэлэлцэх, нөгөө талаас үйлдвэрлэл эрхлэгчид /захиалагч, нийлүүлэгч/ худалдан авах ажиллагаанд оролцоход анхаарах ёстой асуудлын талаар төрийн байгууллагын зүгээс мэдээлэл өгч, хоёр тал хоорондоо уялдаа холбоотой ажиллах юм.
Сургалт 2023 оны 03 сарын 30-ны өдөр 09:00 цагт МУИС, Багш, оюутны хөгжлийн төв, 5 давхар, 501 тоот Хурлын танхимд болно. Сургалтанд хамрагдахыг хүссэн аж ахуй нэгжийн бүртгэлийг 51-261972 утсаар хүлээн авна.
Зохион байгуулагч Монгол Улсын Ерөнхийлөгчийн Тамгын Газар, Сангийн яам, ХХААХҮЯ, Төрийн худалдан авах ажиллагааны газар.