Хүнс, хөдөө аж ахуйн үйлдвэрлэлийг дэмжих хөнгөлөлттэй зээлийн асуудлаар уулзалт, ярилцлага зохион байгуулагдлаа.

Монгол Улсын Ерөнхийлөгчийн санаачлан батлуулсан “Хүнсний хангамж, аюулгүй байдлыг хангах талаар авах зарим арга хэмжээний тухай” УИХ-ын 2022 оны 36 дугаар тогтоолын хэрэгжилтийг хангах хүрээнд хүнсний сүлжээний бүх үе шатанд аюулгүй байдлыг хангах, гол нэрийн хүнсний бүтээгдэхүүн үйлдвэрлэл, түүхий эдийн дотоодын нөөц ашиглалтыг нэмэгдүүлэх, импортын хамаарлыг бууруулах, цаашид хүнс экспортлогч орон болох зорилтыг дэвшүүлсэн.

УИХ-ын 36 дугаар тогтоол, Засгийн газрын 2023 оны “Хүнсний хангамж, хөдөө аж ахуйн салбарын технологит ажлын талаар авах зарим арга хэмжээний тухай” 63 дугаар тогтоолоор хүнс, хөдөө аж ахуйн үйлдвэрлэл эрхлэгчдэд эргэлтийн хөрөнгө болон хөрөнгө оруулалтын зориулалтаар нийт 982.0 тэрбум төгрөгийн зээлийг 5-6 хувийн хүүтэй,  3-5 жилийн хугацаатай, арилжааны банкны эх үүсвэрээр санхүүжүүлж, Засгийн газраас 13 хувийг хүүгийн хөнгөлөлтэйгээр олгохоор шийдвэрлэсэн.

Уг зээлийг арилжааны 10 банкаар дамжуулан эргэлтийн хөрөнгийн болон хөрөнгө оруулалтын зориулалтаар олгох бөгөөд 2023 оны гуравдугаар сарын 30-ны өдөр Хүнс, хөдөө аж ахуй, хөнгөн үйлдвэрийн яам, Сангийн яам, Монголбанктай санхүүжилтийн ерөнхий гэрээг, арилжааны 10 банк (Төрийн,  Хаан, Худалдаа хөгжлийн, Голомт, Капитрон, Тээвэр хөгжлийн, Хас, Богд, Ариг, М банк)-тай эргэлтийн болон хөрөнгө оруулалтын санхүүжилтийн гэрээг тус тус байгуулсан.

Энэ хүрээнд /2023.04.12/ Хүнс, хөдөө аж ахуй, хөнгөн үйлдвэрийн яамнаас Монголбанк, арилжааны 10 банкны төлөөлөл, үндэсний үйлдвэрлэгчид, мэргэжлийн холбоодтой эргэлтийн болон хөрөнгө оруулалтын зээлийн шаардлага, зориулалт, нөхцөл, үр дүн болон бусад асуудлаар мэдээлэл солилцох, нэгдсэн ойлголтод хүрэх зорилгоор хамтарсан уулзалтыг зохион байгууллаа.

Уулзалтад Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Монгол Улсын Ерөнхийлөгчийн Эдийн засгийн бодлогын зөвлөх Б.Даваадалай, ХХААХҮЯ-ны Бодлого, төлөвлөлтийн газрын дарга Ц.Болорчулуун, ХХААХҮЯ-ны Хүнсний үйлдвэрийн бодлогын хэрэгжилтийг зохицуулах газрын дарга Д.Довчинсүрэн болон ХХААХҮЯ, Сангийн яам, банкны салбарын удирдлагууд мөн газар тариалан, мал аж ахуй, хөдөө аж ахуй, хүнсний үйлдвэрлэлийн салбарын төлөөллүүд, мэргэжлийн холбоодууд оролцлоо.

Зээлийг зориулалтын дагуу, үр дүнтэй зарцуулснаар гол нэрийн хүнсний бүтээгдэхүүн үйлдвэрлэл эрхлэгчдэд үйлдвэрлэлээ өргөжүүлэх, шинээр үйлдвэр байгуулах, технологийн шинэчлэл хийх замаар ашиг орлогоо нэмэгдүүлэн, бүтээгдэхүүний аюулгүй байдлыг хангах нөхцөл бүрдэх юм.