УИХ-ын Дэд дарга С.Одонтуяа, Үйлдвэржилтийн бодлогын байнгын хорооны дарга Т.Энхтүвшин, УИХ-ын гишүүн Д.Өнөрболор, УИХ-ын гишүүн Г.Ганболд, МУ-ын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, ХХААХҮЯ-ны Төрийн нарийн бичгийн дарга Т.Жамбалцэрэн, Налайх дүүргийн Засаг дарга Ч.Раднаабазар нарын албаны хүмүүс үндэсний үйлдвэрлэгч “УРБАН БИЗНЕС ГРУПП”-ын үйл ажиллагаатай танилцлаа.
Импортыг орлох деним хувцас дотооддоо үйлдвэрлэн борлуулах зорилготой эгч дүү хоёр 2009 онд анх үүсгэн байгуулсан тус компани өнөөдөр 1 толгой, 6 охин компани бүхий групп болтлоо хөгжиж чадсан үндэсний үйлдвэрлэгчдийн нэг.
Өнгөрсөн хугацаанд Монголын анхны деним хувцас үйлдвэрлэн боловсруулах технологийг эзэмшигч болоод зогсохгүй өдөр тутмын бэлэн хувцасны загвар, зохион бүтээлт, үйлдвэрлэл, маркетинг, борлуулалтын цогц гинжин хэлхээг бий болгож түүгээрээ дамжуулан УРБАН брэндийг дотоодын зах зээлд амжилттай нутагшуулжээ.
Өдгөө 110 гаруй ажилтан, 20 гаруй туслан гүйцэтгэх компанитай “Урбан бизнес групп” өнөөдөр улсын хэмжээнд жийнсэн материалаар бүх төрлийн хувцас үйлдвэрлэж байгаа цорын ганц үйлдвэр юм.
Халамжаас хөдөлмөрт шилжих, ажилтай орлоготой ард түмнийг бий болгоход хувь нэмрээ оруулж байгаа үндэсний үйлдвэрлэгчдэд үйлдвэрлэлийн түүхий эд, материалын зориулалтаар импортлогдож байгаа бараа бүтээгдэхүүн, тоног төхөөрөмж, сэлбэг хэрэглэлийн Гааль болон НӨАТ-аас чөлөөлөх, хөнгөлөлттэй зээлийг хүртээмжтэй олгох зэрэгт төр засаг анхаарах шаардлагатай юм.
