“Хүнсний хувьсгал” хөдөлгөөний хүрээнд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, ХХААХҮЯ-ны Газар тариалангийн бодлогын хэрэгжилтийг зохицуулах газрын дарга Д.Есөн-Эрдэнэ, ЕТГ-ын Референт А.Амаржаргал, Зээлийн батлан даалтын сангийн Батлан даалтын газрын дарга А.Амаржаргал, Хаанбанкны Жижиг, дунд бизнесийн банкны менежер Б.Эрдэнэсүрэн нарын албаны хүмүүс Монголын хүлэмжийн аж ахуйн эрхлэгчдийн төлөөлөл аж ахуй нэгжүүдэд ажиллалаа.

Өнөөдөр /2023.05.07/ Сонгинохайрхан дүүргийн 20-р хороо Толгойтын Ногоон зоорийн хашаанд байрлах хүлэмжийн аж ахуй “Тайванбадрах” ХХК-ийн үйл ажиллагаатай танилцаж, өрхийн хүлэмжийн аж ахуй эрхлэгчидтэй уулзлаа. Уулзалтаар хүнс болон хөдөө аж ахуйн үйлдвэрлэл эрхэлдэг иргэн, хуулийн этгээд, хоршоодод хөрөнгө оруулалтын зориулалтаар шинээр олгох зээл, зээлийн талаарх бусад асуудлаар санал солилцов. Тайванбадрах ХХК нь 2000 оноос хойш тасралтгүй үйл ажиллагаа явуулж байгаа бөгөөд бууцай, юуцай, яншуй салад навч, өргөст хэмх зэрэг нарийн ногоог тарьж ургуулж байна.

Хүлэмжийн аж ахуй эрхлэгчид хүн амаа эрүүл хүнсээр хангах, импортын хэмжээг бууруулах тал дээр санал нэгтэй байгаа бөгөөд төрийн тэргүүний санаачилсан “Хүнсний хангамж, аюулгүй байдал” үндэсний хөдөлгөөнд өөрсдийн зүгээс бололцоотой бүхий л хэлбэрээр идэвхитэй оролцож ажиллана гэв. Импортын хямдхан хүнсний ногоо, жимс их хэмжээгээр хилээр татваргүй шахам орж ирж Монголын хөрсөнд тарьж ургуулсан хүнсний ногооны үнэ ханшийг унагааж, тариаланчдийн хөдөлмөрийг үнэгүйдүүлж байгааг онцгой анхаарч дэмжиж өгөхийг онцлон хүслээ.

Мөн салбар яам, зээлийн асуудал хариуцсан төрийн болон хувийн хэвшлийн төлөөлөл газар дээр нь ирж танилцан, санал солилцож байгаа нь сайшаалтай байна гэлээ.