Монгол Улсын Ерөнхийлөгч У.Хүрэлсүхийн санаачилсан “Хүнсний хувьсгал” үндэсний хөдөлгөөний хүрээнд УИХ-аас “Хүнсний хангамж, аюулгүй байдлыг хангах талаар авах зарим арга хэмжээний тухай” 36 дугаар тогтоолыг 2022 оны 6 сарын 17-ны өдөр баталсан.
Тогтоолд “Хүнсний хувьсгал” үндэсний хөдөлгөөний 2022-2027 онд хийгдэх үйл ажиллагааны төлөвлөгөөг тусгасан. Мөн төлөвлөгөөнд тусгасан 5 бүлэг, 114 зорилт, хэрэгжүүлэх арга хэмжээ тус бүрийг хэрэгжүүлж ажиллах төрийн байгууллагуудаар нь гаргасан. Төрөөс хэрэгжүүлж буй бодлого нь тодорхой, дэмжлэг нь оновчтой, санхүүжилт нь хүртээмжтэй байж, уг хөдөлгөөнийг бодит ажил болгохын тулд “Хүнсний хангамж, аюулгүй байдлыг хангах талаар авах зарим арга хэмжээний тухай” 36 дугаар тогтоолын хэрэгжилтийн явцад хяналт-шинжилгээ хийх шаардлагатай.
Уг асуудлаар Ерөнхийлөгчийн зөвлөх Ч.Даваабаяр ХХААХҮЯ-ны албаны хүмүүстэй уулзалт хийж, санал солилцлоо.
Уулзалтад:
- Монгол Улсын Ерөнхийлөгчийн зөвлөх Ч.Даваабаяр,
- ЕТГ-ын Рефферент А.Амаржаргал нар оролцлоо.
Хүнс, хөдөө аж ахуй, хөнгөн үйлдвэрийн яамнаас:
- ХХААХҮЯ-ны Бодлого, төлөвлөлтийн газрын дарга Ц.Болорчулуун,
- ХХААХҮЯ-ны Хүнсний үйлдвэрийн бодлогын хэрэгжилтийг зохицуулах газрын дарга Д.Довчинсүрэн нар оролцлоо.
Уулзалтаар дараах асуудлыг хэлэлцлээ. Тодруулбал,
- Монгол Улсын Ерөнхийлөгч У.Хүрэлсүхийн ивээл дор “Хүнсний салбарын Шилдэг-100” байгууллагыг тодруулах журмыг эцэслэн боловсруулахаар шийдвэрлэв.
- “Хүнсний хангамж, аюулгүй байдлыг хангах талаар авах зарим арга хэмжээний тухай” Монгол Улсын Их Хурлын 36 дугаар тогтоол, тогтоолын хавсралтад заасан төсөл, арга хэмжээг хэрэгжүүлэгч төрийн байгууллагуудын 2022-2023 оны гүйцэтгэлийн мэдээ, тайланд тулгуурлан Засгийн газраас баталсан тогтоол, шийдвэрийн хэрэгжилт, улсын төсвийн хөрөнгө оруулалтаар салбарт хэрэгжиж буй хөтөлбөр, төсөл, арга хэмжээний хэрэгжилтийн үнэлгээг хийхээр болов.
- Хэрэгжилтийн үнэлгээг 2023 оны 6 сарын 27-нд зохион байгуулагдах “Хүнсний хувьсгал” үндэсний хөдөлгөөнийг хэрэгжүүлэгч төрийн байгууллагуудын 2 дахь удаагийн зөвлөлдөх уулзалтаар танилцуулж, нарийвчлан хэлэлцхээр тогтлоо.
Хэрэгжилтийн үнэлгээний зорилго нь “Хүнсний хувьсгал” үндэсний хөдөлгөөний эхний жилийн үйл ажиллагаанд хяналт-шинжилгээ, үнэлгээ хийж, төлөвлөлт, үйл ажиллагааны гүйцэтгэл, тухайн онд тавьсан зорилт, хүрэх үр дүнг үнэлэх, үр нөлөөг нэмэгдүүлэх, хэрэгжилтийг сайжруулахад зөвлөмж, дүгнэлт гаргах, удирдлагыг үнэн зөв бодит мэдээллээр хангах, дараагийн шатны төлөвлөсөн зорилтыг бүрэн биелүүлэхэд дэмжлэг үзүүлэхэд оршино.
