СБД-т зохион байгуулагдаж буй Шинэ ургацын хүнсний ногооны “Алтан намар-2023” өргөтгөсөн худалдаанд Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр ажиллаж, ногоочид, тариаланчидтай уулзлаа.
19 гол нэр төрлийн хүнсний бүтээгдэхүүнээр дотоодын хэрэгцээгээ хангах, бүс нутагтаа экспортлогч орон болох зорилготой “Хүнсний хангамж, аюулгүй байдал” үндэсний хөдөлгөөний хүрээнд орон нутаг, нийслэлийн удирдлагууд идэвхтэй ажиллаж, хүнс, хөдөө аж ахуйн салбарын үйл ажиллагаагаа өргөтгөж байна. Тухайлбал энэ жил “Алтан намар-2023” үзэсгэлэн худалдаа хичээнгүй сайд Б.Цэрэндоржийн гудамжид анх удаа зохион байгуулагдаж буй юм.
Сүхбаатар дүүргийн Засаг даргын Тамгын газраас хүнсний хангамж, аюулгүй байдал үндэсний хөдөлгөөний хүрээнд “Алтан намар-2023” өргөтгөсөн худалдааг 2023 оны 09 дүгээр сарын 04-нээс эхлэн зохион байгуулах юм.
Энэхүү өргөтгөсөн худалдаанд дүүргийн өрхийн тариалан эрхлэгчдээс гадна Дархан-Уул, Сэлэнгэ аймгийн Шаамар, Орхон, Зүүнбүрэн, Мандал, Сант, Сүхбаатар, Баянгол сумдын тариаланч иргэн, ААНБ-ууд оролцож, эх орны хөрсөнд ургасан төмс, хүнсний ногоо, жимс, жимсгэнэ зэргийг худалдаалж байна.
