Монгол Улсын Ерөнхийлөгч Ухнаагийн Хүрэлсүх “Хүнсний хангамж, аюулгүй байдал” үндэсний хөдөлгөөний хүрээнд Сэлэнгэ аймагт байрлах “АПУ” ХК-ийн “Монгол бяслаг, Шигүдэри” урлах үйлдвэр болон “М Ти Эс” группийн “Сэлэнгэ тариа” ХХК-ийн тариан талбайд ажиллалаа.
“Монгол бяслаг, Шигүдэри” урлах үйлдвэр нь орон нутгийн 40 орчим иргэдийг ажлын байртай болгож, малчдыг орлогожуулахаас гадна бяслагийн дотоодын хэрэгцээний 20 хувийг дангаараа хангаж, импортын хамаарлыг бууруулах, монгол үнээний сүүгээр үйлдвэрлэсэн органик бяслагийг жилийн турш хэрэглэгчдэд нийлүүлэх боломжийг бүрдүүлж байна. Энэхүү үйлдвэр нь Европын Холбооны стандартыг хангасан, байгаль орчинд ээлтэй тоног төхөөрөмжөөр бүрэн тоноглогдсон гэдгээрээ онцлог.
Шинэ түүх эхлүүлж буй “Монгол бяслаг” үйлдвэрийг бүтээн байгуулахад “Хүнсний хувьсгал”-ын хүрээнд төрөөс гаргасан бодлого шидвэрүүд чухал хувь нэмэр оруулжээ.
Одоогийн байдлаар нийт 1,700 гаруй аж ахуйн нэгж 440 орчим тэрбум төгрөгийн хөрөнгө оруулалтын болон эргэлтийн хөрөнгийн зээл аваад байна. Мөн Монгол Улсын газар тариалангийн салбарт олон эерэг үр дүн гарсан бөгөөд энэ жил ургац арвин байх төлөвтэйг салбарын төлөөллүүд онцоллоо.Тухайлбал тус салбарын 1,200 аж ахуйн нэгж нийт 150 тэрбум төгрөгийн хөнгөлөлттэй зээл авчээ.
“Сэлэнгэ тариа” ХХК нь “Хүнсний хангамж, аюулгүй байдал” үндэсний хөдөлгөөний хүрээнд олгосон бага хүүтэй, урт хугацаатай зээл авч, бүрэн автомажсан, 10,000 тонн хүчин чадалтай үр тариа хадгалах цогц үтрэм байгуулахаар ажиллаж байна.
Тус компани 12 мянган га эргэлтийн талбайтай бөгөөд 1 га тутмаас 20-22 цн улаанбуудай болон үр тариа хураан авдаг бөгөөд бусад үндэсний үйлдвэрлэгч, баялаг бүтээгчидтэй хамтран ажиллаж, хураасан үр тариагаа нийлүүлдэг.
2023 онд улсын хэмжээнд 369.3 мянган га-д үр тариа, үүнээс 345.4 мянган га-д улаанбуудай, 18.4 мянган га-д төмс, 13.9 мянган га-д хүнсний ногоо, 89.3 мянган га-д малын тэжээл, 131.7 мянган га-д тосны ургамал, 7 мянган га-д жимс, жимсгэнэ, нийтдээ 629.6 мянган га-д тариалалт хийсэн.
Урьдчилсан балансаар улаанбуудай, төмсний хэрэгцээг 100 хувь, хүнсний ногооны 80 гаруй хувийг дотоодын ургацаас хангах боломж бүрдэж буй юм.
