Өнөөдөр “Мал аж ахуйн сэргэлт” залуу малчдын үндэсний чуулган Монгол Улсын Ерөнхий сайдын ивээл дор Төрийн ордны Их монгол танхимд зохион байгуулагдаж байна.

Монгол Улсын Үндсэн хуулийн нэгдүгээр бүлгийн 5.5 дахь хэсэгт “Мал сүрэг бол үндэсний баялаг мөн бөгөөд төрийн хамгаалалтад байна” хэмээн тунхагласан байдаг. Мал төрийн хамгаалалтад байна гэдэг нь монгол хүний эрүүл мэндийг хамгаалж буй төрийн бодлого бөгөөд хүнсний аюулгүй байдлыг төр хамгаална гэдгээ Үндсэн хуулийн дээрх заалтаар баталгаажуулсан гэж болох юм.

Хэдий бид эцэг хуулиндаа тусгаж, баталгаажуулсан ч бодит амьдрал дээр монгол малын ашиг шим жилээс жилд буурч, бидний шавхагдашгүй гэж үздэг үндэсний баялаг олон эрсдэлтэй нүүр тулж байна. Үүнээс гадна бэлчээрийн хомсдол бий болох, нийгмийн асуудлууд тулгамдах, үйлдвэрлэл экспорт зогсонги байх, хоршоолол нэгдсэн зохион байгуулалтгүй байх зэрэг асуудлууд тулгамдаж байна.

Монгол Улс 110,5 сая га бэлчээрийн талбайтай. Гэвч өнөөдрийн байдлаар 87 хувь нь бэлчээрийн унаган төрхөө алджээ. Мөн бид бүхэн малын чанараас илүү тоонд анхаардаг нь үүний нэг үндэс юм.

Хэл, Хил, Мал гуравтайгаа байхад хэн баян Монгол баян гэж Төрийн шагналт зохиолч, яруу найрагч Зундуйн Дорж хэлсэн байдаг. Иймд монголчуудын үндэсний дархлааг бий болгож буй малчдыг алдаршуулж, тэдэнд тулгамдаж буй нийгмийн асуудлыг төрөөс заавал анхаарч шийдэх шаардлагатай байна. Малчид үгүй бол мал үгүй, мал үгүй бол Монгол улс оршихгүй.

Монгол Улсын Ерөнхийлөгч У.Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөн 2022 оны 6 сараас хэрэгжиж эхэлсэн. Энэ хүрээнд малаа эрүүлжүүлж, ашиг шимийг нь нэмэгдүүлэхэд онцгой анхаарч байна. Тус хөдөлгөөнийг хэрэгжүүлэх УИХ-ын 36-р тогтоолын хүрээнд энэ онд мал аж ахуйн салбарт 132 тэрбуум төгрөгийн эх үүсвэр батлагджээ. Одоогийн байдлаар сүү, махны үхэр, тахианы аж ахуй, тэжээл үйлдвэрлэгчдэд 30 тэрбум төгрөг олгоод байна.