Монгол Улсын Ерөнхийлөгч У.Хүрэлсүх Франц улсад улс төрийн айлчлал хийж байна. Энэ хүрээнд үндэсний үйлдвэрлэгч, баялаг бүтээгчдээ чадавхжуулах, шинэ мэдлэг, мэдээлэлтэй болгох, гадаад зах зээлд нэвтрэх боломжийг нь нэмэгдүүлэх зорилгоор бизнес аялал хийлгэж буй юм.
Энэхүү “Баялаг бүтээгч-бизнес тур” 8 дахь удаагийн аяллын хүрээнд үйлдвэрлэгчид Франц улсын хүнс, хөдөө аж ахуйн боловсон хүчнээ бэлтгэдэг “La Bergerie Nationale” сургалтын төвтэй танилцлаа.
Бизнес аяллыг Ерөнхийлөгчийн зөвлөх Ч.Даваабаяр ахалж ажиллав.
1786 онд 16-р Людовик Франц улсын хүнс, хөдөө аж ахуйн салбарыг хүчирхэгжүүлэх зорилгоор энэхүү сургалтын төвийг байгуулсан бөгөөд өнөөдрийг хүртэл тогтвортой үйл ажиллагаа явуулж иржээ. Иймд Франц улсын хөдөө аж ахуйн салбарын онцлог, мэдлэг туршлага бүхэн энэ сургалтын төвд нэвт шингэсэн байна.
Тус сургалтын төвд 15-22 насны 420 оюутан суралцан мал үржүүлэг, эмчилгээ, морин спортын чиглэлээр мэргэшиж байна. Сурагчдын 70 хувь нь байрлаж хичээллэдэг. Мөн нийт төгсөгчдийн 85 хувь нь шууд ажлын байртай болдог, үлдсэн хувь нь үргэлжлүүлж суралцдаг байна.
La Bergerie Nationale нь Франц улсын Хөдөө аж ахуйн асуудал эрхэлсэн яам, Боловсрол, судалгааны ерөнхий газрын (BGER) хяналтад байдаг. Байгууллагыг Хөдөө аж ахуйн сайдын тушаалаар томилогдсон захирал удирдаж байна. Гаднын оюутан сурагчид хэдий ховор байдаг боловч Монгол улстай хамтран ажиллаж, оюутнуудаа Монгол улс руу явуулахыг хүсэж байгаагаа илэрхийлж байв.
