Монгол Улсын Ерөнхийлөгч Ухнаагийн Хүрэлсүх болон Сангийн сайд Б.Жавхлан, Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Эдийн засгийн бодлогын зөвлөх Б.Даваадалай болон бусад зөвлөхүүд, ЕТГ-ын удирдлагууд “Янмал” компанид ажиллаж, хонины ноосоор үйлдвэрлэсэн бүтээгдэхүүнүүдтэй танилцлаа.
Монгол Улсын хамгийн анхны оймсны үйлдвэрлэгч “Янмал” ХХК өдөрт 20 мянган хос цэвэр даавуун, ноосон оймс, эдлэл үйлдвэрлэх хүчин чадалтай. Малчдын гар дээрээс түүхий ноос авч, угаах, самнах, ээрэх, будах дамжлагын үйлдвэрүүддээ эцсийн бүтээгдэхүүн болгодог бөгөөд оймсны зах зээлийн 60 орчим хувийг хангадаг. Энэ нь жилд есөн сая хос оймс гэсэн үг юм. Мөн 20 орчим улсад бүтээгдэхүүнээ экспортолж байна.
Мөн “Янмал” ХХК нь оймс үйлдвэрлэл болон худалдааны чиглэлээр 18 жил тасралтгүй үйл ажиллагаагаа явуулж ирсэн бөгөөд өнөөдрийн байдлаар 12 үндсэн салбар дэлгүүр ажиллаж байна. Тэрээр монголчуудын бахархал болсон ноос ноолуураар чанар, стандарт болон дэгжин байдлыг илэрхийлэх бүтээгдэхүүнийг үйлдвэрлэж, хэрэглэгчдэд хүргэж байна.
Үүний дээр байгальд ээлтэй үйлдвэрлэл явуулж монгол ноосны үнэ цэнийг олон улсад таниулахаар ажиллаж байна. Мөн “Зарим нийлэг хальсан уутны хэрэглээг хориглох тухай” хуулийн дагуу гялгар уутнаас татгалзаж, хэрэглэгч харилцагчдыг гэр бүлдээ эрүүл сонголт хийж, байгаль эх дэлхийгээ хайрлан хамгаалахын төлөө гялгар уутнаас татгалзахыг уриалан манлайлж ажиллаж байгаа билээ.
Цар тахлын жилүүдэд тухайн үеийн Засгийн газар аж ахуйн нэгжүүдийн дулаан, цахилгаан, ус зэргийн төлбөрийг төрөөс даах шийдвэр гаргасан нь үйл ажиллагаагаа тасралтгүй явуулах, ажлын байраа хадгалж үлдэхэд томоохон дэмжлэг болсныг “Янмал” ХХК-ийн үүсгэн байгуулагч Д.Лхагважав хэллээ.
Цаашид урт хугацаатай, хүү багатай зээл олгож, татварын бодлогоор тууштай дэмжвэл ноос, ноосон бүтээгдэхүүний чиглэлийн аж ахуйн нэгжүүд дотоодын зах зээлээ бүрэн хангаж, экспортоо дорвитой нэмэгдүүлэх боломжтойг хэлэв.
Манай улс жилдээ 30 мянган тонн ноос ашигладаг бөгөөд үлдсэн нь хаягдал болдог. Цаашид ноос бэлтгэх, нийлүүлэх, боловсруулах, эцсийн бүтээгдэхүүн үйлдвэрлэх, борлуулах асуудлыг цогцоор нь шийдэж, ноосоо 100 хувь ашиглаж, ноосыг эдийн засгийн эргэлтэд оруулах нөхцөл бүрдүүлэх чиглэлийг Монгол Улсын Ерөнхийлөгч Ухнаагийн Хүрэлсүх салбар яамнуудад өглөө.
Ингэснээр хонины ноосыг худалдан авч, чанартай бүтээгдэхүүн урлахаас гадна улсын эдийн засаг сайжирч, ажлын байр олноор бий болох, малчдын ахуй амьдрал дээшилж, хөдөө аж ахуйн салбарын хөгжилд ахиц гарах юм.
