Баянхонгор аймаг Монгол Улсын Eрөнхийлөгч У.Хүрэлсүхийн санаачилсан “Хүнсний хувьсгал” үндэсний хөдөлгөөнийг эрчимжүүлэх, мөн аймгийн Иргэдийн Төлөөлөгчдийн Хурлаас баталсан “Баялаг бүтээгч – Баянхонгор хөтөлбөр”-ын хүрээнд 25,7 сая төгрөгийн шагналын сантай “Баянхонгорын брэнд бүтээгдэхүүн” шалгаруулах болзолт уралдааныг үe шаттайгаар зарлаад байна. Уралдааныг “Шинэ бүтээгдэхүүн”, “Импортыг орлосон, экспорт руу чиглэсэн бүтээгдэхүүн” гэсэн 2 төрөлд шалгаруулах бөгөөд хүнс үйлдвэрлэлийн чиглэлээр үйл ажиллагаа явуулж буй иргэн, айл өрх, албан байгууллага, аж ахуй нэгж, төрийн бус байгууллага оролцох боломжтой юм.
Дашрамд дурдахад “Хүнсний хангамж, аюулгүй байдал” үндэсний хөдөлгөөнийг 21 аймагт эрчимжүүлж, хамтран ажиллах зорилготой “Хүнсний хувьсгал” нээлтийн үйл ажиллагаа өнгөрөгч оны 11 дүгээр сард Баянхонгор аймагт зохион байгуулагдсан. Арга хэмжээнд аймгийн удирдлагууд, иргэд, малчид, үйлдвэрлэл эрхлэгчид, хөдөө аж ахуйн салбарын мэргэжилтнүүд оролцож “Хүнсний хангамж, аюулгүй байдлыг хангах талаар авах зарим арга хэмжээний тухай” УИХ-ийн 36-р тогтоолын талаар санал солилцон, өөрсдийн хэрэгжүүлэх төлөвлөгөөг танилцуулсан.
Мөн Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Эдийн засгийн бодлогын зөвлөх Б.Даваадалай тэргүүтэй ажлын хэсэг аймгийн үйлдвэрүүдийн үйл ажиллагаатай танилцаж, санал хүсэлтийг сонссон. Тухайлбал, орон нутгийн үйлдвэрлэгчид үйлдвэрлэсэн бараа бүтээгдэхүүн, нутгийн брэндүүдээ Нийслэл Улаанбаатар хот руу нийлүүлэхэд тээврийн зардал нэмэгдэж үнэд нөлөөлдөг тул бүтээгдэхүүнээ борлуулж чаддаггүй. Иймд гаднын улс руу чиглэсэн экспортын бүтээгдэхүүн бий болгоход анхаарч ажиллана гэдгээ онцолж байсан юм.
