Гаалийн ерөнхий газраас 2024 оны эхний таван сарын байдлаарх экспорт, импортын дүн мэдээг гаргасан байна.
Эхний таван сарын импортын дүнгээр:
- Авто бензин 365.1 мян тн
- Дизель түлш 669.9 мян тн
- Суудлын автомашин 50,519 ш
- Ачааны автомашин 11,864 ш оруулсан байна.
Мөн хугацаанд импортоор нийт 4,395.2 сая ам.долларын бараа, түүхий эд оруулсан нь 2023 оны мөн үеэс 932.3 сая ам.доллароор буюу 26.9 хувиар өссөн байна.
Түүнчлэн улаанбуудай 72,6 мян тн импортолсон нь өмнөх оны мөн үеэс 6.1 дахин, улаанбуудайн гурил 13,9 мян тн импортолсон нь өмнөх оны мөн үеэс 43.9 дахин тус тус өссөн үзүүлэлт юм.
Харин өндөг 10,8 сая импортолсон нь өмнөх оны мөн үеэс 85.1 хувь, цагаан будаа 10,5 мян тн импортолсон нь өмнөх оны мөн үеэс 14.7 хувь тус тус буурчээ.
Гадаад худалдааны гүйцэтгэлээр манай улс экспортод 6,356.0 сая ам.долларын бараа, түүхий эд гаргасан нь өнгөрсөн оны мөн үетэй харьцуулахад 0.8 хувиар өссөн үзүүлэлт аж.
Экспортын барааны нийт дүнд эрдэс бүтээгдэхүүн 5,681.3 сая ам.доллар буюу 89.4 хувь, сувд, үнэт ба хагас үнэт чулуу, үнэт металл, гоёлын зүйлс, зоос 338.0 сая ам.доллар буюу 5.3 хувь, нэхмэлийн материал болон нэхмэл эдлэл 110.1 сая ам. доллар буюу 1.7 хувийг тус тус эзэлж эдгээр нь нийт экспортын дүнгийн 96.4 хувийг эзэлж байна.
2024 оны эхний таван сард экспортолсон:
- Хар тугалгын хүдэр болон баяжмал, төмрийн хүдэр, зэсийн баяжмал, цайрын баяжмал, түүхий нефть болон чулуун нүүрсийг 100 хувь БНХАУ-д,
- Үхэр адууны боловсруулсан ширний 76.4 хувийг БНХАУ-д,
- Самнасан ноолуурын 70.4 хувийг Италид,
- Ямааны угаасан ноолуурыг 99.9 хувь БНХАУ-д тус тус экспортолж дээрх нэрийн бараа нь экспортын нийт дүнгийн 86.8 хувийг эзэлж байна.
Эх сурвалж: Ikon.mn