Аймаг, орон нутагт “Хүнсний хангамж, аюулгүй байдал” үндэсний хөдөлгөөний хэрэгжилт, үр дүнтэй танилцах “Зөвлөлдөх уулзалт” Өвөрхангай аймагт боллоо.

Уулзалтыг нээж аймгийн Засаг дарга Д.Пүрэвдорж үг хэлж, хүнсний хангамжийн бодлогын ач холбогдлыг онцлон хэлэв.
Мөн Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр “Хүнсний хангамж, аюулгүй байдал” үндэсний хөдөлгөөний хүрээнд улс даяар хийгдэж буй үйл ажиллагаа, дэвшүүлж буй зорилтуудын талаар танилцуулж, орон нутгийн хүнсний үйлдвэрлэл эрхлэгчидтэй санал солилцлоо.

Улмаар аймгийн хүнсний салбарын өнөөгийн байдал, үндэсний хөдөлгөөний хүрээнд хэрэгжүүлсэн ажлууд, үр дүнгийн талаар Хүнс, хөдөө аж ахуйн газрын Үйлдвэр, худалдаа үйлчилгээний албаны дарга Ц.Ариунаа дэлгэрэнгүй мэдээлэл өгсөн юм.

Мөн орон нутгийн хүнсний салбарын баялаг бүтээгчид Бүсчилсэн хөгжлийн бодлогын хүрээнд “Хүнсний хувьсгал” үндэсний хөдөлгөөний 2 дугаар шатыг эхлүүлэн эрчимжүүлж, жижиг дунд үйлдвэрлэлийг дэмжих хэрэгтэйг хэлж байв.

Өвөрхангай аймагт 55 хүнсний үйлдвэр, аж ахуй нэгж “Хүнсний хувьсгал”-ын хүрээнд олгогддог хөнгөлөлттэй зээлд хамрагдаж, аймгийн дотоодоосоо хангах хүнсний бүтээгдэхүүний хүртээмжийг өсгөхөөр хамтран ажиллаж байна.

Ингэхдээ газар тариалан, мах, дайвар бүтээгдэхүүн боловсруулах үйлдвэр, цех байгуулахад анхаарч, төр, хувийн хэвшлийн түншлэлийг сайжруулан, нутгийн брэнд бүтээгдэхүүнийг дотоод, гадаадын зах зээлд нийлүүлнэ.