“Говь, хээрийн бүсийн усны нөөцийг хуримтлуулах, нөхөн сэргээх нь” сэдэвт уулзалт, хэлэлцүүлэг Говь-Алтай аймгийн Алтай суманд болж байна.
Тус уулзалт, хэлэлцүүлэг нь усны нөөцийг хамгаалах, хуримтлуулах, нөхөн сэргээх, зохистой ашиглах чиглэлээр орон нутагт хэрэгжүүлж буй бодлого, сайн туршлагыг хуваалцахын зэрэгцээ тулгамдаж буй асуудлыг хэлэлцэн, цаашдын шийдлийг тодорхойлох зорилготой юм.
Хэлэлцүүлэгт Байгаль орчин, уур амьсгалын өөрчлөлтийн салбарын төрийн байгууллагуудын төлөөлөл, 21 аймгийн Байгаль орчны газрын удирдлага, мэргэжилтнүүд оролцож байна.
Оролцогчид усны нөөцийг хамгаалах, нөхөн сэргээх, ус хуримтлуулах арга, технологи, уур амьсгалын өөрчлөлтөд дасан зохицох чиглэлээр хэрэгжүүлж буй ажлын үр дүн, сайн туршлагаа танилцуулж, харилцан туршлага солилцон, хамтын ажиллагааг бэхжүүлэх асуудлаар санал солилцох юм.
Мөн уулзалт, хэлэлцүүлгийн үеэр усны нөөцийн доройтол, булаг, шандын ширгэлт, газрын доорх усны нөөцийн хамгаалалт зэрэг тулгамдсан асуудлыг хэлэлцэж, усны нөөцийг хамгаалах, зохистой ашиглах чиглэлээр бүс нутаг хоорондын хамтын ажиллагааг өргөжүүлэх, үр дүнтэй шийдэл, арга замыг тодорхойлох талаар хэлэлцэх тухай Говь-Алтай аймгийн Байгаль орчны газрын дарга Д.Батмагнай мэдээллээ.
Тэрбээр, энэхүү уулзалт, хэлэлцүүлэг нь усны нөөцийн тогтвортой менежментийг бэхжүүлэх, байгаль орчны тэнцвэрт байдлыг хадгалах, уур амьсгалын өөрчлөлтийн сөрөг нөлөөллийг бууруулах чиглэлээрх хамтын ажиллагааг шинэ шатанд гаргах ач холбогдолтойг онцоллоо.
Эх сурвалж: Монцамэ агентлаг
