Монгол Улсын Ерөнхийлөгч Ухнаагийн Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд УИХ-аас 36-р тогтоолыг баталсан. Тус тогтоолыг хэрэгжүүлэх арга хэмжээний танилцуулгыг Ерөнхийлөгчийн тамгын газрын Хүнсний төсөл, хөтөлбөр хариуцсан ажлын алба хамтарч ажиллах төрийн байгууллага, хувийн хэвшил, олон улсын байгууллагуудад танилцуулж байна. Энэ хүрээнд Дэлхийн банк группын Олон Улсын Санхүүгийн Корпорацийн “Монгол мах” төслийн баг, хамт олонтой уулзлаа.
Тус уулзалтад Дэлхийн Банк Группын гишүүн Олон Улсын Санхүүгийн Корпорацийг төлөөлөн:
- Олон Улсын Санхүүгийн Корпорацийн Зөвлөх Үйлчилгээ, “Монгол мах” төслийн удирдагч Д.Жигжидмаа
- Олон Улсын Санхүүгийн Корпорацийн Зөвлөх Үйлчилгээ, “Монгол мах” төслийн Хуулийн зөвлөх Ж.Нарантуяа
- Олон Улсын Санхүүгийн Корпорацийн Зөвлөх Үйлчилгээ, “Монгол мах” төслийн мал эмнэлэг, хүнсний аюулгүй байдлын зөвлөх Х.Ганзориг
- Олон Улсын Санхүүгийн Корпорацийн Зөвлөх Үйлчилгээ, “Монгол мах” төслийн хүнсний аюулгүй байдал, стандарт баталгаажуулалтын зөвлөх Г.Сарангэрэл
“Хүнсний хангамж, аюулгүй байдал” үндэсний хөдөлгөөний ажлын хэсгийг төлөөлөн:
- Хүнсний төсөл, хөтөлбөр хариуцсан албаны Ахлах референт Д.Цэвээндорж
- Хүнсний төсөл, хөтөлбөр хариуцсан албаны референт О.Дамдиндулам
- Хүнсний төсөл, хөтөлбөр хариуцсан албаны Гадаад харилцааны мэргэжилтэн Р.Будмаа
- Хүнсний төсөл, хөтөлбөр хариуцсан албаны Хэвлэлийн ажилтан Б.Сэржмядаг нар оролцлоо.
Монгол Улсын брэнд хүнс бол мах юм. Гэвч дэлхийн зах зээлд гаргаж, дэлхийн брэнд болгоход стандартын шаардлага хангадаггүй. Иймд Дэлхийн Банк Группын гишүүн Олон Улсын Санхүүгийн Корпораци “Монгол мах” төслийг хэрэгжүүлж байна. Төслийн хүрээнд дараах үйл ажиллагааг хэрэгжүүлэхээр төлөвлөсөн. Үүнд:
- Зохистой дадалыг хэрэгжүүлэх гарын авлагыг боловсруулах, хэрэгжүүлэхэд дэмжлэг үзүүлэх
- Махны техникийн зохицуулалтыг хэрэгжүүлэхэд дэмжлэг үзүүлэх
- Экспортын чиг баримжаатай үйлдвэрүүдэд зөвлөгөө өгч, импортлогч орны тавьж буй шаардлагад нийцүүлэн үйл ажиллагаа явуулах тал дээр сургалт явуулах
- Био хамгаалал бүхий аж ахуйн эрхзүйн орчныг бий болгоход туслах гэх мэт ажлуудыг хийх юм.
Бид мах экспортлохын тулд эхлээд импортлох улсынхаа шаардлагыг судлан, түүнд нийцсэн бүтээгдэхүүн боловсруулах ёстой. Монгол махны экспортын 95 хувь нь Хятад руу гардаг бөгөөд тус улс дотоодын хүнсний аюулгүй байдалд онцгой анхаарах болсон. Тиймээс Хятад улсын тавьж буй стандартыг хангаж чадвал бусад оронд ч махаа экспортлох боломжтой гэдгийг уулзалтын үеэр онцолж байв.
Дэлхийн Банк Группын гишүүн Олон Улсын Санхүүгийн Корпорацийн “Монгол мах” төслийн хамт олон БНХАУ-ын Гаалийн ерөнхий газраас гаргасан дүрэм, журам, шийдвэрийг орчуулж үйлдвэрлэгч, экспортлогч, төрийн байгууллагуудад мэдээлэл болгон түгээж байна. Монгол Улсад мах экспортлох хүсэлтэй олон байгууллага байгаа ч мэдлэг, мэдээлэл дутуугийн улмаас зорилгоо биелүүлж чаддаггүй. Эдгээр хүмүүс “Монгол мах” төслийн багийн орчуулсан дээрх мэдээллийг хамгийн түрүүнд анхаарч, судлах шаардлагатай гэв.
