Бялхам Ивээл ХХК -ны хамт олон Монгол Улсын Ерөнхийлөгчийн санаачилсан “Хүнсний хангамж, аюулгүй байдал үндэсний хөдөлгөөн”-д нэгдлээ.
БНСУ-ын иргэн Sung-Chul Kim Сэлэнгэ аймгийн Баянгол суманд /хуучнаар Баруун хараа/ 20 гаруй жил амьдарч, хүнсний ногоо, жимс жимсгэнэ тариалж, жилийн 4 улирлын турш шинэхэн органик нарийн ногоо, хүнсний ногоогоор нийслэл хотын иргэдийг хангаж байна.
Үр сортын технологийг баталгаажуулаагүй, үр сортоор хангагдаагүй тохиолдолд хэчнээн тариалалтын арга технологийг хөгжүүлсэн ч үр сортын компанид захирагдах нь гарцаагүй. Монгол орны цаг уурын нөхцөлд тохирсон үр сортыг хөгжүүлэн, хүнсний ногоо жимс жимсгэнэ тариалж байгаа Бялхам Ивээл компани нь жижиг улаан лоолийн (үрлэн помидор) сортуудыг гаргажээ. Ургац болон амт чанар сайтай, хэмжээ нь хүртэл тохиромжтой үрлэн помидор нь эрлийз сорт биш тул жил бүр шинэ үр худалдаж авах шаардлагагүй, улаан лоолийн доторх үрийг үргэлжлүүлэн дахин дахин хэрэглэж болно.
Тус компанийн зүгээс жижиг улаан лоолийн (үрлэн помидор) сортыг 2023 оны намраас Монголын тариачин айлуудад нийлүүлэхээр төлөвлөсөн байна.
Монгол орны газарзүй, цаг уурын нөхцөлд жимс, үндэст ногоо, нарийн ногооны сортыг асар их хүч хөдөлмөрөөр нутагшуулж хэрэглэгчдэд эрүүл хүнс хэрэглэх боломжийг олгодог хүлэмжийн ногоо эрхлэгчид, тариаланчиддаа Хүнсний хувьсгалд нэгдэхийг уриалж байна
