Монгол хүний эрүүл, аюулгүй амьдрах таатай орчин, нөхцөлийг бүрдүүлэх суурь асуудлын нэг нь хүнсний аюулгүй байдал, хүнсний хангамжийг нэмэгдүүлэх, дотоодын хэрэгцээгээ бүрэн хангаж, улмаар хүнс экспортлогч орон болох явдал гэж Монгол Улсын Ерөнхийлөгч Ухнаагийн Хүрэлсүх үзэж “Хүнсний хангамж, хүнсний аюулгүй байдал” үндэсний хөдөлгөөнийг орон даяар өрнүүлээд байна.
Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөнд Ж.Гантөмөр захиралтай “Цээлийн хур” компани нэгдлээ.
“Цээлийн хур” компани нь 2010 оноос эхлэн Төв аймгийн Цээл суманд газар тариалангийн үйлдвэрлэлийг тогтвортой эрхэлж, нийт 4585 га-г бүрэн эргэлтэд оруулан ажиллаж байгаа баялаг бүтээгч юм. Тус хамт олон нь сүүлийн 5 жилд 3012-3283 га-д улаанбуудай тариалж, нэгжээс авах ургац 12.7-26.8 цн, нийт 2458.8-6421.3 тонн ургац хураан авсан өндөр амжилт үзүүлж байна. “Цээлийн хур” компани нь 2022 оны “Улсын хошой аварга тариаланч”-аар шалгарсан шилдэг тариаланч хамт олон юм.
Ирэх таван жилд хүнсний хувьсгал хийх зорилтыг биелүүлэхэд газар тариалан болон хүнсний ногоо эрхлэгчид чухал хувь нэмэр оруулна.
Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр газар тариалангийн салбарын нэгэн жарны түүхийг бүтээсэн залуу тариаланч Ж.Гантөмөр захиралтай “Цээлийн хур” компанийн нийт хадланчид, тариаланчдад улс орныхоо хөгжилд оюун ухаан, эрдэм мэдлэгээ зориулж салбарынхаа хөгжил, ирээдүйн чиг хандлагыг тодорхойлоход үнэтэй хувь нэмэр оруулж, хичээнгүйлэн ажиллаж байгаад талархахын зэрэгцээ хүнсний хэрэгцээгээ дотоодоосоо бүрэн хангаж бусдаас гуйхгүй хэмжээнд байхын төлөө дор бүрнээ хичээн ажиллах ёстойг захилаа.
