Монгол Улсын Ерөнхийлөгч Ухнаагийн Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөнд манай улсын хүнсний үйлдвэрлэл, худалдаа, үйлчилгээ, катеринг, хөдөө аж ахуйн салбарын хөгжилд үнэтэй хувь нэмэр оруулж буй баялаг бүтээгч “Хаан Хүнс” компани нэгдлээ.

“Хаан Хүнс” ХХК анх 2002 онд бизнесийн үйл ажиллагаагаа эхэлснээс хойш хүнсний үйлдвэрлэл, худалдаа, үйлчилгээ, хөдөө аж ахуйн чиглэлээр 20 жил үйл ажиллагаагаа явуулсаар эдүгээ 300 орчим ажилтан, албан хаагчидтайгаар бизнесээ амжилттай явуулж салбарын тэргүүлэгч “Хүнсний Манлай Үйлдвэр” болтлоо өргөжин тэлжээ.

Байгуулагдсан цагаасаа хойш хагас боловсруулсан бууз баншны зах зээлийг шинээр бий болгож, 11 төрлийн банш, буузыг хэрэглэгч та бүхэндээ нийлүүлж байна. Үйлдвэрлэлийн 70 хувь нь хагас болон бүрэн автомат тоног төхөөрөмжөөр тоноглогдсон бөгөөд чанарын өндөр түвшинд үйл ажиллагаагаа явуулж байна.

Нийт зах зээлийн 50 гаруй хувийг дангаар ханган нийт харилцагчдад хүрч ажилладаг тус компани үйлчлүүлэгчдийнхээ хүнсний аюулгүй байдлыг хангах зорилгоор хүнсний ногоогоо тариалж, байгалийн салхижуулалттай зоорийг барьж ашиглалтанд оруулан ашиглаж байна.