УИХ-ын дарга Гомбожавын Занданшатар өнөөдөр ТБХ-ны дарга Г.Тэмүүлэн, ЭЗБХ-ны дарга Ц.Цэрэнпунцаг, НББХ-ны дарга П.Анужин нарын хамтаар жижиг, дунд үйлдвэрлэлийн төлөөлөл, Баялаг бүтээгчдийг дэмжих холбоо-ны гишүүн, сурагчийн ширээ сандал, модон тавилга үйлдвэрлэгч “ОББТМ” компанийн үйлдвэрлэлийн үйл ажиллагаатай танилцлаа.
“ОББТМ” компани нь мод болон төмөр хийц хослосон ширээ сандлыг үйлдвэрлээд 23 жил болж байна. Тус компани дотоодын их дээд сургууль, ерөнхий боловсролын сургууль, цэцэрлэгт стандартын шаардлага хангасан эдэлгээ сайтай сандал ширээг үйлдвэрлэн нийлүүлж байна. Манай улс мод, модон материал, тавилгын 45 орчим хувийг дотоодоос, 55 орчим хувийг импортоор авдаг.
Тэгвэл дотооддоо үйлдвэрлэсэн сургуулийн сандал, ширээ нь импортын сандал ширээнээс эдэлгээ урттай болохыг бүтээгдэхүүн авсан газрын төлөөлөл онцолж байгаа юм. Тухайлбал “ОББТМ” компани 2018 онд нийслэлийн ЕБС-ийн 141-р сургуульд 740 сурагчийн ширээ мөн тооны хос сандал нийлүүлжээ. Мөн орон нутгаас ч захиалга их авдаг байна. Тухайлбал 2019 онд Өмнөговь аймагт 860 сурагчийн модон ширээ, мөн тооны хос сандлыг нийлүүлсэн байна.
ЕБС-ийн бага ангийн сурагчид үдийн хоолоо стандартын шаардлага хангасан ширээ сандал дээр идэх нь тэдний өсөлт хөгжил, эрүүл мэндэд хамгийн их нөлөөлдөг. Нийт “үдийн хоол” хөтөлбөрт хамрагддаг хүүхдүүдийн 40 орчим хувь зөвхөн сургууль дээрээ халуун хоол иддэг гэх судалгаа бий. Тиймээс сурагчдыг стандартын шаардлага хангасан ширээ сандлаар хангах ажилд “ОББТМ” компани чухал байр суурь эзэлж байна.
“ОББТМ” компани нь айл өрх, албан байгууллага гэр ахуйн модон тавилга, орчны тохижолтын хашаа, хайс, бүх төрлийн төмөр хийцийн бүтээгдэхүүн хийж байна.
