УИХ-ын дарга Гомбожавын Занданшатар өнөөдөр ТБХ-ны дарга Г.Тэмүүлэн, ЭЗБХ-ны дарга Ц.Цэрэнпунцаг, НББХ-ны дарга П.Анужин нарын хамтаар жижиг, дунд үйлдвэрлэлийн төлөөлөл, Баялаг бүтээгчдийг дэмжих холбоо-ны гишүүн, Эко гар утасны тавиур, эко модон тавиур үйлдвэрлэгч, баялаг бүтээгч Б.Батзоригийн үйлдвэрлэлийн үйл ажиллагаатай танилцлаа.
Иргэн Б.Батзориг нь 2019 оноос тавилгын үлдэгдэл болон хаягдал материалыг ашиглан “Эко гар утасны тавиур” үйлдвэрлэх төслийг санаачлан Германы олон улсын хамтын нийгэмлэгийн инновацийн төсөлд 200 гаруй төслөөс шалгарч 19 сая төгрөгний үнэ бүхий хөрөнгө оруулалт хийгдэж СНС машин, офиссын тоног төхөөрөмж авч үйл ажиллагаагаа өргөжүүлсэн.
Уг төслөө амжилттай хэрэгжүүлснээр олон залуучуудыг ажлын байртай болгох эхлэл тавигдаж, “Эко гар утасны тавиур” төсөл нь “Эко таваг” шинэ бүтээгдэхүүнээр төрлөө нэмж хүний хэрэгцээг нэг дор хангасан эко бүтээгдэхүүн гэдгээрээ “2021 оны Шилдэг гарын бэлэг-Шилдэг Эко бүтээгдэхүүн “-ээр шалгарсан. 2021 онд Засгийн газраас хэрэгжүүлсэн “Ажлын байр дэмжих” эргэлтийн зээлд хамрагдаж, 15 хүнийг тогтмол ажлын байраар ханган ажиллаж буй баялаг бүтээгч юм.
Идэж буй хоол хүнсний сав суулга эрүүл мэндэд хор нөлөөгүй байх нь чухал
Хүнсний хангамж, аюулгүй байдалдаа онцгой анхаарах шаардлагатай болсон энэ цаг үед эко модон бүтээгдэхүүнүүд нь импортоор орж ирдэг хуванцар бүтээгдэхүүнийг орлож, хэрэглэгчдийн сэтгэлд нийцсэн бүтээгдэхүүн болж байна.
Эко гар утасны тавиур нь хэрэглэгчдийн эрүүл мэнд, сэтгэл ханамж, байгалийн үнэ цэнийг мэдрүүлэх, байгальтай илүү ойр байлгах боломжийг олгох бөгөөд “Ухаалаг гар утасны хэрэглэгч бүрийн хэрэгцээг хангасан” цэвэр эко бүтээгдэхүүнийг чанартай үйлдвэрлэн, зах зээлд нийлүүлэн, өөрийн эзлэх байр суурьтай болох явдал юм. Түүнчлэн өдөр тутмын хэрэглээ болох гар утаснаас ялгарах цацраг идэвхит бодис нь хүний хараанд үл тусдаг учир хүний биед сөрөг нөлөө үзүүлэн ургийн хөгжил муудах,нойр хулжих, хорт хавдар үүсэх, өсөлт удаашрах, тархинд сөргөөр нөлөөлөх, үргүйдэх, зүрхний шигдээс болох , бага насны хүүхдүүдээ сөргөөр нөлөөлөх зэргээр өвчлөл үүсгэдэг байна. Тиймээс энэхүү асуудлаас урьдчилан сэргийлэхийн тулд Эко модон гар утасны тавиурыг гол шийдэлээ болгосон хэмээн баялаг бүтээгч Б.Батзориг уулзалтын үеэр дурдлаа.
