Дорноговь аймаг Монгол Улсын Ерөнхийлөгч У.Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөн, аймгийн Засаг даргын 2020-2024 онд хэрэгжүүлэх үйл ажиллагааны “Хөгжлийн төлөө хамтдаа-2” хөтөлбөрийг хэрэгжүүлэх зорилгоор “Намрын ногоон өдрүүд -2023” үзэсгэлэн худалдаа зохион байгууллаа.
Энэхүү арга хэмжээнд Хөгжлийн шийдэл төрийн бус байгууллага, Монголын худалдаа аж үйлдвэрийн танхимын Дорноговь аймаг дахь салбар танхим болон 12 сумын 106 гаруй иргэн, аж ахуйн нэгж, хоршоо, нөхөрлөл, төрийн 9 байгууллага, үүрэн холбооны 1, банк, санхүүгийн 3 байгууллага, тус тус оролцож бараа, бүтээгдэхүүн, ажил, үйлчилгээгээ сурталчилан хүргэв.
Орон нутгийн үйлдвэрлэгчдийн шилдэг бараа, бүтээгдэхүүн, тариаланчдынхаа шинэ ургацын дээжийг хэрэглэгч олонд шууд хүргэх боломжийг олгодог энэхүү арга хэмжээнд оролцогчдын тоо, бараа бүтээгдэхүүний нэр төрөл, чанар, хүртээмж жилээс жилд нэмэгдэж иргэдийн дунд хүлээлт үүсгэсэн томоохон арга хэмжээний нэг болтлоо өргөжжээ.
Дорноговь аймгийн хувьд бүсийн онцлогоос шалтгаалан газар тариалан эрхлэхэд хүндрэлтэй хэдий ч энэ жил аймгийн хэмжээнд 30 аж ахуйн нэгж байгууллага, 338 айл өрх нийт 168.4 га талбайд тариалалт хийж 614.4 тн ургац хураан авах урьдчилсан төлөвтэй байна. Тариалсан талбайн хэмжээ өмнөх оны мөн үеэс 35.4 %-иар, ургацын хэмжээ 33,2 хувиар өсч аймгийн нийт хүн амын төмс, хүнсний ногооны 31,3 хувийг хангах боломж бүрдэж байна.
