Өнөөдөр /2023.10.26/ хүнс, хөдөө аж ахуйн салбарын холбоодын нэгдэл “Хүнсний хувьсгал” ТББ-ын үйл ажиллагаа албан ёсоор эхэлж байна.
Монгол орон даяар “Хүнсний хувьсгал” болон өрнөж буй “Хүнсний хангамж, аюулгүй байдал” үндэсний хөдөлгөөн Монгол Улсын Ерөнхийлөгч У.Хүрэлсүхийн санаачилгаар хэрэгжиж байна. Энэхүү санаачилгын зорилго нь дотоодын хэрэгцээгээ 19 гол нэр төрлийн хүнсний бүтээгдэхүүнээр хангахаас гадна бүс нутагтаа экспортлогч улс болох юм. Тус зорилгыг биелүүлэхэд үндэсний үйлдвэрлэгчид, баялаг бүтээгчид чухал үүрэг гүйцэтгэнэ гэж үзэж байгаа бөгөөд тэднийг дэмжсэн 24 төрлийн бодлого шийдвэр төрөөс гараад байна.
Энэхүү ажлын дараагийн шат буюу хүнс, хөдөө аж ахуйн салбарын үйлдвэрлэгчдийн нэгдсэн холбоодын төлөөллүүдээс бүрдсэн, “Хүнсний хангамж, аюулгүй байдал” үндэсний хөдөлгөөний үр дүнг эрчимжүүлэх үүрэг бүхий “Хүнсний хувьсгал” ТББ албан ёсоор байгуулагдлаа. Төрийн бус байгууллагын Гүйцэтгэх захиралаар М.Болод сонгогдоод байна.
Тус холбоо нь УИХ-ын 36-р тогтоол, УИХ-ын түр хорооны 2-р тогтоол, Засгийн газрын 63-р тогтоолтой уялдуулан импортыг орлох, экспортыг нэмэгдүүлэх , хүнсний аюулгүй байдлыг хангах чиглэлд түлхүү ажиллахаар 2023-2024 оны ажлын төлөвлөгөөгөө хэлэлцэн баталлаа. Мөн үйл ажиллагаа хяналт, үнэлгээ хийх хяналтын зөвлөлөө сонгов.
