Монгол Улсын Ерөнхийлөгч У.Хүрэлсүх хоёр өдрийн өмнө Дорноговь аймагт ажиллахдаа Сайншанд, Замын-Үүд сумын иргэдтэй уулзсан билээ.
Энэ үеэр Монгол Улсын Ерөнхийлөгчийн бодлого, үйл ажиллагаа, гадаад харилцаа, нийгэм, эдийн засгийн байдал хийгээд “Тэрбум мод”, “Хүнсний хувьсгал”, “Цагаан алт”,“Ерөнхийлөгчийн илгээлт-2100”, “Эрүүл монгол хүн” хөдөлгөөн, хөтөлбөрийн үр дүнгийн талаар танилцуулсан юм.
Монгол Улсын эдийн засаг 6.8 хувиар өсөж, нэг хүнд ногдох дотоодын нийт бүтээгдэхүүн 7000 ам.доллар давж, уул уурхайн бус экспорт, хөрөнгө оруулалт нэмэгдэж, гадаад валютын нөөц 8.9 тэрбум ам.долларт хүрчээ. Эдгээр амжилтад Дорноговь аймаг, сумдын төр, захиргааны байгууллага, хувийн хэвшил, баялаг бүтээгчид, иргэдийн оруулсан хувь нэмэр чухал байсныг Ерөнхийлөгч онцолсон юм.
“Хүнсний хувьсгал” хөдөлгөөний хүрээнд улсын хэмжээнд 53 хүнсний үйлдвэр шинээр ашиглалтад орж, 1000 гаруй нэр төрлийн хүнсний бүтээгдэхүүн үйлдвэрлэж, зах зээлд нийлүүлж байна. Дотоодын хүнсний үйлдвэрлэлийг нэмэгдүүлэх зорилготой тус хөдөлгөөнд говь нутгийн иргэд, бизнес эрхлэгчид идэвхтэй оролцож байна.
Тухайлбал, Дорноговь аймагт үйл ажиллагаа явуулдаг “Мөрөөдлийн говь” ХХК “Хүнсний хангамж, аюулгүй байдал” үндэсний хөдөлгөөн буюу “Хүнсний хувьсгал”-д нэгдэж, тахианы аж ахуй, газар тариалангийн чиглэлээр амжилттай ажиллаж буй үндэсний үйлдвэрлэгч юм. Тус компани Сайншанд суманд хүнсний ногоо тариалах, мод үржүүлэхийн зэрэгцээ бүрэн автоматжуулсан 60-70 мянган өндөглөгч тахианы аж ахуй эрхэлдэг. Ингэснээр аймгийн өндөгний хэрэгцээг 100 хувь дотоодоос хангаж байна.
Одоогоор Дорноговь аймаг мах, өндөгний хэрэгцээгээ 100 хувь, сүү, сүүн бүтээгдэхүүнийхээ 77 хувь, төмс, хүнсний ногооныхоо 30 хувийг дотоодын үйлдвэрлэлээр хангаж байна.
Мөн “Ерөнхийлөгчийн илгээлт-2100” хөтөлбөрийн эхний шатанд Дорноговь аймгийн ерөнхий боловсролын сургуулийн 2026 оны төгсөгчдөөс 12 сурагч шалгарсан.
Тэрээр говь нутгийн иргэдэд хандан бүх шатанд сахилга, хариуцлагыг эрхэмлэж, өнөөдрийн ололт амжилтаа бататган, эв нэгдлийг эрхэмлэн, эх орноо хөгжүүлэхийн төлөө хичээн ажиллахыг уриалсан юм.
Эх сурвалж: Монцамэ агентлаг
