Монгол Улсын Ерөнхийлөгч У.Хүрэлсүхийн зарлигаар “ГБТ Трейдинг” компанийн ерөнхий технологич Цээпэлийн Төгсөө төрийн дээд “Алтан гадас” одонгоор энгэрээ мялаалгалаа.
Тулгар төрийн 2230, 2231, Их Монгол Улс байгуулагдсаны 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ойг тохиолдуулан Монгол Улсын Ерөнхийлөгч Ухнаагийн Хүрэлсүх зарлиг гарган улс орны хүнсний хангамж, хүнсний аюулгүй байдалд үнэтэй хувь нэмэр оруулж, хүнс үйлдвэрлэлийн салбарт олон жил зүтгэсэн Баялаг бүтээгчдэд төрийн дээд цол, одон медаль гардууллаа.
Чимээгүйхэн хөдөлмөрлөдөг энэ хүмүүст шагнал өгч байгаад баярлаж байна.
Ц.Төгсөө
Тэрбээр “Монгол улсын ерөнхийлөгч У.Хүрэлсүх “Хүнсний хувьсгал” эхлүүлээд, манай хүнсний салбарт шагналын хур буусан сайхан өдөр байна. Хүнсний ногоочид, үйлдвэрлэгчид, ногоо боловсруулагчид гээд чимээгүйхэн хөдөлмөрлөж байдаг хүмүүс маань энэ шагналд хамрагдаж байгаад туйлын их баяртай байна. Төрдөө зүтгэлээ үнэлүүлж энэ сайхан шагналыг хүртэж буй хүнсний салбарын бүх чимээгүй баатрууддаа “ГБТ Трейдинг” компанийн нийт хамт олны өмнөөс болон хувиасаа чин сэтгэлийн талархал илэрхийлье” хэмээгээд салбарынхаа нийт ажиллагсаддаа Үндэсний их баяр наадмын мэнд дэвшүүллээ.
Жилээс жилд үйлдвэрлэх бүтээгдэхүүнийхээ тоо хэмжээ, нэр төрлийг нэмэгдүүлж дотоодын зах зээл дээрх тэргүүлэх байр сууриа улам бататган ажиллаж байгаа “ГБТ” трейдинг компанийн нийт хамт олонд болон Төр түмэндээ хөдөлмөр, зүтгэлээ үнэлүүлж, энгэрээ мялаалгасан ерөнхий технологич Ц.Төгсөө таны цаашдын ажил, амьдралд амжилт хүсье.