Баяр наадмыг тохиолдуулан Монгол Улсын Ерөнхийлөгч У.Хүрэлсүхийн зарлигаар хүнс, хөдөө аж ахуйн салбарынханд төрийн дээд цол, одон, медаль гардууллаа. Хүнс, хөдөө аж ахуйн салбарын хөгжилд оруулсан хувь нэмрээ үнэлүүлэн салбартаа олон жил үр бүтээлтэй хөдөлмөрлөсөн эрхмүүд Сүхбаатар, Алтангадас одон хүртсэн бол хүнс, хөдөө аж ахуй, газар тариалангийн салбараас шинэхэн гавьяатууд төрөн гарлаа. Төрийн дээд цол, одон, медалийг Монгол Улсын Ерөнхийлөгчийн Тамгын газрын дарга Я. Содбаатар хүнсний салбарын түүчээлэгчдэд гардуулсан юм.

Монгол Улсын Ерөнхийлөгч У.Хүрэлсүх хүнсний салбарт хувьсгал хийж 19 нэр төрлийн хүнсний бүтээгдэхүүнийг дотоодоосоо 100 хувь хангах, цаашлаад хүнс экспортлогч улс орон болох зорилтыг Хүнсний хангамж, аюулгүй байдал үндэсний хөдөлгөөний хүрээнд дэвшүүлсэн. Улмаар хүнсний хангамж, аюулгүй байдлын талаарх УИХ-ын тогтоолын төсөл батлагдсан. Улс орны хэмжээнд далайцтай өрнөхөөр зэхэгдэж буй “Хүнсний хувьсгал” нь хүнс, хөдөө аж ахуйн салбарт шинэ сэргэлт авчирсан хөдөлгөөн болно гэдгийг салбарынхан онцолж Ерөнхийлөгчийн санаачилгыг талархан хүлээн авч байгаа юм. Энэ хүрээнд Ерөнхийлөгч У.Хүрэлсүх болон ХХААХҮ-ийн сайд З.Мэндсайхан тэргүүтэй албаны хүмүүс дотоодын хүнсний үйлдвэрүүд, мэргэжлийн байгууллага, лабораториудтай биечлэн очиж танилцан тулгамдаж буй асуудлыг хүлээн авч сонссон. Тэгвэл Хүнс, хөдөө аж ахуй хөнгөн үйлдвэрийн сайд З.Мэндсайхан хүнсний салбарт түүчээлэгч, дотоодын хүнсний манлай болсон тус үйлдвэрүүдийн ажилтан, албан хаагчдийн хөдөлмөр зүтгэлийг үнэлэн МУ-ын Ерөнхийлөгчийн зарлигаар Хөдөлмөрийн гавьяаны улаан тугийн одон, Хөдөлмөрийн хүндэт медалийг хүртээлээ.

Ийнхүү Тулгар төрийн 2230, 2231, Их Монгол улсын 815, 816, Үндэсний эрх чөлөө, тусгаар тогтнолоо сэргээн мандуулсны 110,111 Ардын хувьсгалын 100,101 жилийн ойн баяр наадмыг тохиолдуулан ард түмний эрүүл мэнд, улс орны хүнсний хангамж, аюулгүй байдлын манаанд зогсдог хүнсний салбарынхан төрийн дээд одон, медаль, цол тэмдгээр шагнууллаа.